५६ दिनपछि इरानको खुमेनी विमानस्थल पुनः सञ्चालन, अन्तर्राष्ट्रिय उडानहरू फेरि सुरु

१२ वैशाख, काठमाडौं । अमेरिकी र इजरायली आक्रमणका कारण करिब दुई महिनासम्म ठप्प रहेको इरानको हवाई सेवा पुनः शुरू भएको छ। अमेरिकी राष्ट्रपति डोनाल्ड ट्रम्पले युद्धविराम सम्झौतामा समय थप्ने घोषणापछि शनिबारदेखि इरानबाट अन्तर्राष्ट्रिय उडानहरू फेरि सुरु भएका छन्। बीबीसीका अनुसार, इरानको राजधानी तेहरानको इमाम खुमेनी अन्तर्राष्ट्रिय विमानस्थलबाट शनिबार बिहानदेखि अन्तर्राष्ट्रिय उडानहरू सञ्चालनमा आएका छन्। त्यहाँबाट पश्चिम एसियाका विभिन्न शहरहरूमा उडानहरू भैरहेका छन्, जुन समाचारमा इरानी सञ्चारमाध्यमहरूले उद्धृत गरेका छन्।

तेहरानबाट उडान गरिएका शहरहरूमा साउदी अरेबियाको मदिना, ओमानको मस्कट र टर्कीको इस्तानबुल समावेश छन्। अमेरिका र इरानबीच २८ फेब्रुअरीमा भएको आक्रमणपछि इरानको सबै हवाई सेवा अवरुद्ध भएको थियो। त्यसयता ५६ दिनसम्म तेहरानतर्फका सबै अन्तर्राष्ट्रिय उडानहरू निलम्बित थिए। ८ अप्रिलमा पाकिस्तानको मध्यस्थतामा अमेरिका र इरानले दुई हप्ताका लागि युद्धविराम सहमति जनाएका थिए। सो क्रममा पाकिस्तानको राजधानी इस्लामाबादमा दुवै देशका वार्ताकारबीच शान्ति वार्ताहरू भएका थिए, तर ती वार्ताहरू सफल हुन सकेनन्। ८ अप्रिलमा भएको युद्धविराम सहमति २१ अप्रिलमा सकिएको थियो। त्यसपछि पनि अमेरिकी राष्ट्रपति ट्रम्पले युद्धविराम अवधि थप गरिएको घोषणा गरेका छन्। यसै सन्दर्भमा शनिबार इरानका विदेशमन्त्री अब्बास अराघची पाकिस्तान भ्रमणमा छन् भने अमेरिकी प्रतिनिधिमण्डल पनि पाकिस्तानमै रहेको विभिन्न रिपोर्टहरूले जनाएका छन्। तर अर्को चरणको शान्ति वार्ताका बारेमा अहिलेसम्म कुनै स्पष्ट निर्णय भएको छैन।