ओपन एआईका प्रमुख कार्यकारी अधिकृत (सीईओ) साम अल्टम्यानले क्यानडाको एक विद्यालयमा भएको सामूहिक गोलीकाण्डका मुख्य अभियुक्तको च्याटजिपिटी एकाउन्टसम्बन्धी सुरक्षा निकायलाई पूर्वजानकारी नदिएकोमा माफी मागेका छन्। गत फेब्रुअरी १० मा क्यानडाको ब्रिटिस कोलम्बियास्थित टम्बलर रिज सेकेन्डरी स्कुलमा १८ वर्षीय जेसी भ्यान रुट्सेलरले अन्धाधुन्ध गोली चलाउँदा ६ विद्यार्थीहरू सहित उनका आमाबुवा र भाई गरी ८ जनाको ज्यान गएको थियो।
शुक्रबार ब्रिटिस कोलम्बियाका प्रिमियर डेभिड इबीले सामाजिक सञ्जालमा सार्वजनिक गरेको पत्रमा अल्टम्यानले उक्त समुदायले भोगिरहेको पीडा अत्यन्त गहिरो रहेको भन्दै आफ्नो निकटतम संवेदना व्यक्त गरेका छन्। उनी भन्छन् कि आक्रमणकारीको च्याटजिपिटी एकाउन्ट घटना हुनुभन्दा करिब आठ महिनाअगाडि नै प्रतिबन्धित गरिएको थियो।
‘जुन महिनामा प्रतिबन्ध लगाइएको उक्त एकाउन्टबारे कानुनी निकायलाई जानकारी गराउन नसकेकोमा म हृदयदेखि नै माफी चाहन्छु,’ अल्टम्यानले पत्रमा लेखेका छन्। ओपन एआईले गत फेब्रुअरीमा सिबिएस न्युजलाई दिएको जानकारीअनुसार, स्वचालित दुरुपयोग पहिचान प्रणाली र मानव अनुसन्धानकर्ताहरूले उक्त एकाउन्टलाई हिंसात्मक गतिविधिमा प्रयोग हुनसक्ने भन्दै ‘फ्ल्याग’ गरेका थिए। तर, तत्कालीन समयमा कम्पनीले उक्त प्रयोगकर्ताबाट तत्काल र गम्भीर शारीरिक क्षतिको जोखिम नरहेको निष्कर्ष निकालेर प्रहरीलाई खबर नगर्ने निर्णय गरेको थियो। घटनापछि कम्पनीले रोयल क्यानडियन माउन्टेन पुलिससँग सहकार्य गरिरहेको र भविष्यमा यस्ता घटना पुनः नघट्नेगरी सुरक्षा प्रणालीहरूमा सुधार गर्ने प्रतिबद्धता जनाएको छ।
सम्बन्धित खबर
