डोल्पाको त्रिपुरासुन्दरी नगरपालिका-९ स्थित चुगाँड खोलामा मालबाहक ट्रक फसेपछि जाजरकोट–डोल्पा सडकखण्ड अवरुद्ध भएको छ। सडक अवरुद्ध भएपछि डोल्पा भित्रिने र बाहिरिने सवारीसाधन रोकिएको छ। १४ वैशाख, डोल्पा।
सोमबार बिहान करिब १० बजे नेपालगंजबाट डोल्पातर्फ आउँदै गरेको मालबाहक ट्रक उक्त खोलामा फसेपछि भेरी करिडोर अन्तर्गत जाजरकोट–डोल्पा सडकखण्ड अवरुद्ध भएको त्रिपुराकोट इन्चार्ज रवीन्द्र सार्कीले जानकारी दिएका छन्। उनका अनुसार ट्रक खोलामै अड्किएपछि सवारी आवागमन पूर्ण रूपमा ठप्प भएको छ।
सडक अवरुद्ध भएपछि डोल्पा भित्रिने तथा बाहिरिने सवारीसाधन घण्टौंदेखि बीच बाटोमै रोकिएका छन् भने डोल्पाबाट नेपालगंज, सुर्खेत हुँदै काठमाडौँतर्फ जाने यात्रुहरू लामो समयदेखि अलपत्र परेका छन्।
