त्रिवि क्रिकेट मैदानको म्याद थपका लागि क्यानले राखेप र खेलकुद मन्त्रालयमा पत्र पठायो
नेपाल क्रिकेट संघले त्रिवि क्रिकेट मैदानको म्याद थपका लागि राष्ट्रिय खेलकुद परिषद् र युवा तथा खेलकुद मन्त्रालयलाई पत्र पठाएको छ। राष्ट्रिय खेलकुद परिषद्का सदस्य सचिव रामचरित्र मेहताले पत्र प्राप्त भइसकेको र छलफलपश्चात निर्णय लिने बताउनु भएको छ। युवा तथा खेलकुद मन्त्री सस्मित पोखरेलले त्रिवि क्रिकेट मैदान र क्यानबीच पुनः भाडा सम्झौता हुने बताउनुभएको छ। १५ वैशाख, काठमाडौं।
नेपाल क्रिकेट संघ (क्यान)ले त्रिवि क्रिकेट मैदानको म्याद थपका लागि राष्ट्रिय खेलकुद परिषद् (राखेप)लाई पत्र पठाएको छ। त्रिभुवन विश्वविद्यालयसँग २५ वर्षे सम्झौता सकिन लाग्दा क्यानले सम्झौता अवधि थप गर्न राखेप र युवा तथा खेलकुद मन्त्रालयमा पत्र पठाएको हो। क्यानको पत्र प्राप्त भइसकेको छ र थप छलफल गरेर अगाडि बढ्ने जनाउँदै राखेपका सदस्य सचिव रामचरित्र मेहताले जानकारी गराउनुभएको छ।
‘पत्र प्राप्त भएको छ। सम्बन्धित निकायसँग छलफल गरेर के गर्ने निर्णय गरिनेछ,’ उहाँले भन्नुभयो। मन्त्रालयले राखेपबाट आएको पत्रको आधारमा अगाडि बढ्ने जनाएको छ। ‘बोधार्थको रूपमा मन्त्रालयमा पनि पत्र आएको छ। राखेपबाट आउने कुराको आधारमा अगाडि लैजानेछौं,’ मन्त्रालयका स्रोतले बताएका छन्। क्यानले २०५९ सालमा राष्ट्रिय खेलकुद परिषद् मार्फत त्रिविसँग सम्झौता गरेको थियो। ठूला खेल कार्यक्रमका कारण विश्वविद्यालयको अध्ययन तथा अनुसन्धान कार्य प्रभावित हुने त्रिविको निष्कर्ष रहेको छ। त्यसैअनुसार, विश्वविद्यालयले ४ वैशाखमा आफ्नो स्वामित्वमा रहेको अतिक्रमित जग्गा खाली गर्न क्यानसहित १८ वटा निकायलाई अल्टिमेटमसहित ३५ दिने नोटिस जारी गरेको थियो। तर, युवा तथा खेलकुद मन्त्री सस्मित पोखरेलले त्रिवि क्रिकेट मैदान र नेपाल क्रिकेट संघबीच पुनः भाडा सम्झौता हुने अभिव्यक्ति दिएका छन्।
