नेपाल पत्रकार महासंघले कमल प्रसाईंमाथि आक्रमण गर्नेहरूलाई कारबाही गर्न जोडदार माग गरेको छ

१६ वैशाख, काठमाडौं । नेपाल पत्रकार महासंघले अनलाइनखबरका पत्रकार कमल प्रसाईंमाथि आक्रमण गर्ने व्यक्तिहरूलाई कानुनी कारबाही गर्न जोडदार माग गरेको छ। महासंघका महासचिव रामप्रसाद दाहालले जारी गरेको विज्ञप्तिमा भनिएको छ, ‘महासंघले यो आपराधिक कार्यमा संलग्न व्यक्तिहरूलाई तुरुन्तै पहिचान गरी उनीहरूलाई कानूनी दायरामा ल्याउन सम्बन्धित निकायसँग जोडदार माग गर्दछ।’

काठमाडौं उपत्यकाको मनोहरास्थित सुकुमवासी बस्तीको रिपोर्टिङको क्रममा १२ वैशाखमा प्रसाईंमाथि ज्यान मार्ने उद्देश्यले आक्रमण गरिएको थियो। आक्रमणपछि घाइते भएका प्रसाईंको नाकको अपरेसन गरिएको छ। त्यस्तै, आक्रमणकारीहरूले प्रसाईंको क्यामेराको मेमोरी कार्ड समेत खोसेका थिए।