१७ वैशाख, रोल्पा । थवाङ गाउँपालिका-१ मा २० जनाको ज्यान जाने गरी भएको जिप दुर्घटनाको उद्धार कार्य राति परेपछि रोकिएको छ। घटनास्थलमा भारी वर्षा भईरहेको र रात पनि परिसकेकोले मृतकको शव पहिचान गरी आफन्तसम्म पुर्याउने काम बाँकी रहेको स्थानीय प्रशासनले जनाएको छ। रोल्पाका प्रमुख जिल्ला अधिकारी गंगाबहादुर क्षेत्रीका अनुसार मृतक २० जनाको शव घटनास्थलबाट संकलन गरिसकिएको छ। ती शवहरूलाई संकलन गरेर एउटै स्थानमा राखिएको छ। भोलि बिहान उज्यालो भएपछि मात्र उद्धार कार्य अगाडि बढाउने र शव पहिचान तथा पोस्टमार्टमका लागि जिल्ला सदरमुकाम ल्याइने जनाइएको छ।
