इरानी विदेशमन्त्रीको व्यंग्य: ‘इजरायल फर्स्ट’ नीतिको अर्थ ‘अमेरिका लास्ट’ हो

१८ वैशाख, काठमाडौं । इरानका विदेशमन्त्री अब्बास अराघचीले पछिल्लो युद्धमा भएको खर्चबारे अमेरिकाले झुट बोलेको टिप्पणी गरेका छन्। यसअघि अमेरिकी रक्षामन्त्री पिट हेगसेथले इरानसँगको युद्धमा अमेरिकाले २५ अर्ब डलर खर्च गरेको बताएका थिए। शुक्रबार एक्समार्फत प्रतिक्रिया दिँदै इरानी विदेशमन्त्री अराघचीले अमेरिकी रक्षा मन्त्रालयले वास्तविक खर्च रकमबारे झुट बोलेको दाबी गरेका छन्।

‘पेन्टागन झुट बोलिरहेको छ। नेतान्याहु (इजरायलका प्रधानमन्त्री बेन्जामिन नेतान्याहु) को यो जुवाका कारण अमेरिकाले अहिलेसम्म सिधा १०० अर्ब डलर नोक्सान भोग्नुपरेको छ,’ अराघचीले एक्समा लेखेका छन्, ‘अमेरिकी दाबीभन्दा चार गुणा बढी खर्च भइसकेको छ।’ अराघचीले अमेरिकी करदातामाथि अप्रत्यक्ष लागत अझै धेरै रहेको उल्लेख गरेका छन्। ‘सबै अमेरिकी परिवारमाथि प्रतिमहिना ५०० डलर खर्च आइरहेको छ। यो तीव्र गतिमा बढिरहेको छ,’ उनले भने। अराघचीले ‘इजरायल फर्स्ट’ नीतिको मतलब ‘अमेरिका लास्ट’ रहेको पनि बताएका छन्।