बेलायतमा स्थानीय निर्वाचन सुरु, नेपाली मूलका डेढ दर्जनभन्दा बढी उम्मेदवारहरू मैदानमा
२४ वैशाख, लन्डन। ७ मे बिहीबार (आज) बेलायतका चारमध्ये तीन राष्ट्रहरू इंग्ल्यान्ड, स्कटल्याण्ड र वेल्समा स्थानीय निर्वाचन सुरु भएको छ। १३६ विभिन्न स्थानीय काउन्सिलहरूमा कुल ५ हजार १४ सिटहरूका लागि मतदान भइरहेको छ। यस निर्वाचनमार्फत् स्कटल्याण्ड र वेल्सका मतदाताले आफ्नो राष्ट्रिय संसदका प्रतिनिधि चयन गर्नेछन् भने इंग्ल्यान्डका ३० काउन्सिलमा काउन्सिलर र मेयरहरू चयन हुनेछ। साथै, इंग्ल्यान्डका क्रोइडन, ह्याक्नी, लुइसाम, न्यूह्याम, टावर ह्यामलेट्स र वाटफोर्डसहितका ६ स्थानीय तहमा मेयर पदको चुनाव पनि हुँदैछ। मतदान बिहान ७ बजेदेखि सुरु भई राति १० बजेसम्म जारी रहनेछ। अधिकांश क्षेत्रका नतिजा शुक्रबार दिनभर उपलब्ध हुने अपेक्षा छ। यो चुनावलाई वर्तमान प्रधानमन्त्री केयर स्टार्मरको एक प्रकारको जनमत सर्वेक्षण को रूपमा हेरिएको छ।
कन्जर्भेटिभ पार्टीको १४ वर्ष लामो शासन अन्त्य गर्दै ठूलो अपेक्षासहित सत्तामा आएका स्टार्मरको लोकप्रियता हाल घट्दै गएको छ। सरकारमा आएपछि गरिएका केहि नीतिगत यू-टर्नहरू, आर्थिक चुनौतीहरू र जनअपेक्षा पूरा गर्न नसक्नुले उनको छवि कमजोर बनाएको छ। प्रायः स्थानीय तहका चुनावहरू सडक, सरसफाइ र स्थानीय सेवामा केन्द्रित हुन्छन्, तर यसपटकको चुनाव राष्ट्रिय राजनीतिसँग सिधा सम्बन्धित छ। मतदाताले यस निर्वाचनमा सरकारप्रतिको आफ्नो सन्तुष्टि वा असन्तुष्टि व्यक्त गर्नेछन्। विश्लेषकहरूले लेबर पार्टीले उल्लेखनीय सिट गुमाउने खतरा रहेको देखाएका छन्, जसले स्टार्मरको नेतृत्वमाथि प्रश्न उठाउन सक्छ। अर्कोतर्फ, रिफर्म यूके जस्ता दक्षिणपन्थी र ग्रिन जस्ता वैकल्पिक दलहरूको उदयले बेलायतमा परम्परागत दुई दलीय प्रणाली कमजोर हुँदै गएको छ।
यसपटकको स्थानीय निर्वाचनमा नेपाली मूलका दरयौं उम्मेदवारहरू पनि छन्। जानकारीअनुसार कन्जर्भेटिभ पार्टीबाट कम्तीमा एक दर्जन नेपाली मूलका उम्मेदवार छन्। सत्तारुढ लेबर, लिबरल डेमोक्रेट, ग्रिन र जेरेमी कोर्बिन नेतृत्वमा रहेको योर पार्टीबाट समेत नेपाली मूलका उम्मेदवारहरू रहेका कारण जम्मा संख्या डेढ दर्जन भन्दा बढी हुन सक्छ। नेपाली मूलका उम्मेदवारहरू बीच केही रोचक संयोगहरू पनि देखिएका छन्। कतिपय बरोहरूमा नेपाली दम्पती काउन्सिलर पदका उम्मेदवार छन् भने केही क्षेत्रमा नेपाली मूलका उम्मेदवारहरूबीच सघर्ष छ।
उदाहरणस्वरूप, लन्डनको रोयल बरो अफ ग्रिनविचमा पूर्वमेयर जित रानाभाट प्लमस्टिड एन्ड ग्लिन्डन वार्डबाट उम्मेदवार छन् भने उनकी श्रीमती गौमाया गुरुङ सोही बरोको एबिउड वार्डबाट उम्मेदवार छिन्। दुवै लेबर पार्टीका हुन्। प्लमस्टिड एन्ड ग्लिन्डन वार्डमा लेबर पार्टीका पूर्वनेता जेरेमी कोर्बिन नेतृत्वको योर पार्टीको समर्थनमा नरेन्द्र कँडेल पनि उम्मेदवार रहेका छन्। त्यस्तै, अल्डरसटको वेलिङटन वार्डमा कन्जर्भेटिभ पार्टीबाट डा. विशाल गुरुङ र लेबर पार्टीबाट उत्तरबहादुर गुरुङ उम्मेदवार छन्। यी दुवै वार्डमा तीन-तीन काउन्सिलर निर्वाचित हुने भएकाले प्राविधिक रूपमा नेपाली दुवै उम्मेदवार चयन हुने संभावना छ, यद्यपि मत विभाजनको कारण एकले जित्ने र अर्कोले हार्ने सम्भावना पनि कायम छ।
पूर्व डीएसपी शिवजी श्रेष्ठ पनि लेबर पार्टीबाट बेजिङस्टकको ब्राइटनहिल वार्डमा चुनावी मैदानमा छन्। ज्ञानप्रसाद गुरुङ कन्जर्वेटिभ पार्टीबाट स्विन्डनको पार्क साउथमा चुनाव लडेका छन् भने प्रतीक्षा गुरुङ लेबर पार्टीबाट ब्याटल वार्ड, रिडिङमा चुनावी मैदानमा छन्। इन्द्राहाङ लिम्बु फेल्थाममा कन्जर्वेटिभ उम्मेदवार हुँ।
