नेपाली मिक्स मार्शल आर्ट्स (एमएमए) फाइटर युकी आङदेम्बेले भारतमा सम्पन्न मेट्रिक्स फाइट नाइट (एमएफएन)-१८ मा भारतका मन्दिप प्रजापतीलाई पहिलो चरणमै नोकआउट गर्दै पराजित गरेका छन्। ग्रेटर नोइडा स्थित विजय सिंह पथिक इन्डोर स्पोर्ट्स कम्प्लेक्समा शनिबार राति सम्पन्न फाइनलमा युकीले २ मिनेट ३१ सेकेण्डमा मन्दिपलाई पराजित गर्दै घरेलु समर्थकहरूलाई चुप लगाएकै थिए। २७ वर्षीय युकी, जो नेपालमा जन्मिएर बेलायतमा हुर्किएका हुन्, यस जितसँगै नेपालको झन्डा फहराउन सफल भएका छन्।
युकीले एमएमएममा शारीरिक र मानसिक रूपमा बलियो हुनुपर्ने र दबाबलाई इन्धनको रूपमा प्रयोग गर्नुपर्ने बताएका छन्। उनले युवालाई आफ्नै लगनशीलता र प्रेरणालाई पछ्याउन सुझाव दिँदै भने, “यो खेल शारीरिक रूपमा मात्र बलियो भएर पुग्दैन। मानसिक रूपमा कमजोर भए शारीरिक प्रदर्शनमा पनि असर पर्छ।” युकीले एमएमए खेल्नका लागि पढाइ र खेललाई सँगै अघि बढाउन कठिनाइ पनि अनुभूत गरेको बताए।
युकीले सानोपनमा क्रिकेट खेल्ने गरेका थिए, तर ब्याक इन्जुरीका कारण निरन्तरता दिन नसकेको र पछि एमएमएममा लागेको बताएका छन्। उनले भने, “स्कूलमा पढ्दा म क्रिकेट खेल्थें। त्यसपछि जिम ज्वाइन गरेपछि एमएमएममा रुचि बढ्न थाल्यो।” युकीले नेपालमा एमएमएको क्रेज तीव्र गतिमा बढ्दो र नेपाली फाइटरहरूको स्तर पनि उल्लेखनीय भएको बताए। उनले भने, “नेपालमा यो खेल धेरै विकसित भएको छ। नेपालीहरूको डीएनएमै लडाइँ हुनुपर्ने हुन्छ।”
युकीले आफूलाई आफ्नो काममा केन्द्रित राख्दै रोल मोडेल बन्न भन्दा फोकस विस्तार गर्नुपर्ने बताएका छन्। उनले भने, “आफ्नो जुनसुकै लगनशीलता छ, त्यसलाई पछ्याउनुपर्छ र कडा मिहिनेत गर्नुपर्छ।” युकीले हाल धेरैले यो खेलमा चासो देखाउँदै आएका र आफूलाई धेरै भाग्यमानी महसूस गरेको पनि बताए।
