संयुक्त राज्य अमेरिकाको रक्षा मन्त्रालय पेन्टागनले ‘यूएफओ’बारे हालै सार्वजनिक गरेका दस्तावेजहरूमा सर्वसाधारण मानिसले पृथ्वीबाट र अन्तरिक्षयात्रीहरूले चन्द्रमाबाट अज्ञात वस्तुहरू देखेको भनिएका घटनाका विवरण समावेश छन्। यसअघि गोप्य राखिएका ती दस्तावेज गत शुक्रबार सार्वजनिक गरिएको हो। राष्ट्रपति डोनाल्ड ट्रम्पको निर्देशनअनुसार ती दस्तावेज अनलाइन पोस्ट गरिएको छ। गत वर्ष ट्रम्पले यूएफओबारे “व्यापक रुचि देखिएको” भन्दै त्यससँग सम्बन्धित सामग्री सार्वजनिक गर्न निर्देशन दिएका थिए। अमेरिकामा केही वर्षयता पृथ्वीबाहिर जीवन हुन सक्ने विषयमा चासो बढेको देखिन्छ। अमेरिकी कङ्ग्रेसमा सन् २०२२ मा ५० वर्षमा पहिलो पटक यूएफओबारे सुनुवाइ भएको थियो। त्यस क्रममा अमेरिकी सेनाले उक्त विषयलाई अझ पारदर्शी बनाउने प्रतिबद्धता व्यक्त गरेको थियो। अमेरिकी रक्षा मन्त्रालयले आफ्नो वेबसाइटमा शुक्रबार १६१ वटा फाइल उपलब्ध गरायो। आगामी दिनहरूमा थप दस्तावेज सार्वजनिक हुने ठानिएको छ।
गत फेब्रुअरी महिनामा भूतपूर्व अमेरिकी राष्ट्रपति बराक ओबामाले एलियनहरू “वास्तविक हुन्, तर मैले देखेको छैन” भनेपछि सर्वसाधारण मानिसमा बाह्यलोक र त्यहाँ जीवहरू हुन सक्ने विषयमा चासो चुलिएको थियो। ओबामाले आफूले भनेको कुराबारे स्पष्टीकरण दिएका छन्। उनले बाह्यलोक जीवन हुन सक्ने तथ्याङ्कीय सम्भावनाबारे टिप्पणी गरेका छन्, तर राष्ट्रपति हुँदा त्यसलाई पुष्टि गर्ने “कुनै प्रमाण भने नदेखेको” बताएका छन्। सोही महिना ट्रम्पले पेन्टागनलाई “एलियन र बाह्यलोकीय जीवन, अनआइडेन्टिफाइड एरिअल फेनोमिना (यूएपी) र अनआइडेन्टिफाइड फ्लाइङ अब्जेक्ट्स (यूएफओ)”सँग सम्बन्धित फाइलहरू सार्वजनिक गर्न अनुमति दिए।
शुक्रबार सार्वजनिक गरिएका पहिलाका गोप्य फाइलहरूमा सैन्य टिपोटहरू, अमेरिकाले चन्द्रमामा पठाएका विभिन्न एपोलो मिशनहरूका प्रतिवेदनहरू र मानिसहरूले आफ्नो यूएफओ देखेको दाबी र आफूलाई उक्त वस्तु बाह्यलोकबाट आएको हुन सक्ने लागेको भनाइबारे तयार पारिएका रिपोर्टहरू छन्। एपोलो अन्तरिक्षयात्रीहरूले देखेका ‘प्रकाशका झिल्काहरू’ अहिले सार्वजनिक फाइलहरूमा छन्। अमेरिकाले चन्द्रमामा सन् १९६० र १९७० का दशकमा चन्द्रमा अवतरण गर्ने उद्देश्यसहित सञ्चालन गरेका विभिन्न एपोलो मिशनमा सहभागी अन्तरिक्षयात्रीहरूको वार्तालापका अभिलेखहरू पनि यी दस्तावेजहरूमा समावेश छन्। एपोलो ११, एपोलो १२ र एपोलो १७ का ती अभिलेख पहिला गोप्य राखिएका थिए।
एपोलो ११ अभियानमा सहभागी ख्यातिप्राप्त अन्तरिक्षयात्री बज एल्ड्रिनले सन् १९६९ मा दिएको र शुक्रबार प्रकाशित एउटा अन्तर्वार्तामा चन्द्रयात्राका क्रममा आफूले व्याख्या गर्न नसकिने विभिन्न घटनाहरू देखेको बताएका छन्। “मैले निकै उज्यालो देखिने प्रकाशको एउटा स्रोत देखेँ जसलाई हामीले त्यो सम्भवतः लेजर हुन सक्ने ठान्यौँ,” उनले भने। ती अभिलेखमा एपोलो १२ का अन्तरिक्षयात्री एलन बीनले आफूले “अन्तरिक्षमा निस्किएका” कण र प्रकाशका झिल्काहरू देखेको बताएको उल्लेख छ।
अर्को एउटा फाइलमा सन् १९६५ को ‘जेमिनाई ७’ अन्तरिक्ष उडानका बेला अन्तरिक्षयात्री फ्र्याङ्क बोर्मन र पृथ्वीमा रहेको सहयोग गर्ने टोलीबीच भएको संवादको अडिओ रेकर्डिङ छ। त्यसमा उनले आफ्नो यानको देब्रेपट्टि एउटा अज्ञात वस्तु देखेको जानकारी नासाको मिशन कन्ट्रोललाई दिएका छन्। उनले त्यसलाई एउटा “बगी” र त्यसपछाडि “खर्बौँ साना कणहरू” जस्तो भनेका छन्।
सांसदहरूले स्वागत गरेको पेन्टागनको कदमले यूएफओ विषयमा सरकार पारदर्शी हुनुपर्ने आवाज उठाएको छ। रिपब्लिकन कङ्ग्रेसम्यान टिम बर्शेटले यसलाई “गजबको थालनी” भनेका छन्। यद्यपि पूर्वसांसद मार्जरी टेलर ग्रीनले ती दस्तावेजहरू सार्वजनिक गर्नुको उद्देश्य खर्च गर्न सक्ने क्षमता र इरान युद्धजस्ता अमेरिकीहरूले खेपेका अन्य गम्भीर विषयहरूबाट ध्यान मोड्नु रहेको दाबी गरेकी छन्।
