युक्रेनी राष्ट्रपति भोलोदिमिर जेलेन्स्कीमाथि उनका पूर्व प्रेस सचिव युलिया मेन्डेलले कोकिन प्रयोग गर्ने र व्यक्तिगत स्वार्थका लागि युद्ध लम्ब्याएको आरोप लगाएकी छन्। अमेरिकी पत्रकार टकर कार्लसनसँगको अन्तर्वार्तामा मेन्डेलले अज्ञात स्रोतहरूलाई उद्धृत गर्दै जेलेन्स्कीले सन् २०२२ को इस्तानबुल शान्ति वार्तालाई कमजोर पारेर युद्ध जारी राख्ने रणनीति अपनाएको दाबी गरिन्।
उनी भनिन् कि जेलेन्स्की प्रायः ब्रिफिङ् अघि नै वेपत्ता हुने गरेका छन् र जो बाइडन जस्ता व्यक्तिहरूको आडमा युद्धलाई ‘प्रोपोगान्डा’ का रूपमा प्रयोग गरिरहेको उल्लेख गरिन्। ‘उहाँले व्यक्तिगत स्वार्थका लागि शान्तिको अवसरलाई अस्वीकार गरी युद्ध लम्ब्याउनुभएको छ,’ उनले थपिन्। मेन्डेलले जेलेन्स्कीको लागुऔषध प्रयोगबारे आरोप लगाए तापनि उनले आफैँले राष्ट्रपतिलाई कहिल्यै कोकिन प्रयोग गरेको देखेको छैन भनी स्वीकारेकी छन्।
सन् २०२१ मा रुसी पूर्णस्तरको आक्रमण अघि नै आफ्नो पद छाडेकी मेन्डेलका आरोपलाई युक्रेनी अधिकारीहरूले पूर्ण रूपमा अस्वीकार गरेका छन्। युक्रेनी सरकारले मेन्डेललाई विगतका विवादित छविका कारण ‘अविश्वसनीय’ पात्रको रूपमा चित्रण गरेको छ। फेरि पनि अमेरिकी सहायता र युद्धको भविष्यबारे बहस भइरहेका बेला आएको यो असत्यापित आरोपले अन्तर्राष्ट्रिय सञ्चारमाध्यममा ठूलो चर्चा बटुलेको छ।
सम्बन्धित खबर
