टिपटो स्पोर्ट्स एकेडेमीले जेठ २ र ३ गते तारकेश्वरस्थित टिपटो स्पोर्ट्स हबमा ‘थ्री अन थ्री फुटबल क्लिनिक तथा च्याम्पियनसिप २०२६’ आयोजना गर्ने भएको छ। जापानका राष्ट्रिय खेलाडी यासुहिरो नाबेटाले क्लिनिक सत्रमार्फत नेपाली खेलाडीहरूलाई प्रशिक्षण दिनेछन्। प्रतियोगितामा यू–१४ र यू–१६ उमेर समूहका ३२ टोली नकआउट प्रणालीमा प्रतिस्पर्धा गर्नेछन् र विजेतालाई प्रमाणपत्र, मेडल र ट्रफी प्रदान गरिनेछ।
सन् २०२१ मा स्थापना भएको उक्त एकेडेमीले ग्रासरुट फुटबल विकास, युवा खेलाडीको सहभागिता वृद्धि तथा विभिन्न प्रशिक्षण कार्यक्रम र प्रतियोगितामार्फत खेलकुद विकासमा योगदान गर्दै आएको छ। कार्यक्रम अन्तर्गत यासुहिरो नाबेटा नेपाल आउनेछन् र उनले क्लिनिक सत्रमार्फत नेपाली खेलाडीहरूलाई प्रशिक्षण दिनेछन्।
जेठ २ गते बिहान ९ बजेदेखि दिउँसो २ बजेसम्म ३–३ फुटबल क्लिनिक (प्रशिक्षण सत्र) सञ्चालन हुनेछ भने जेठ ३ गते बिहान १० बजेदेखि दिउँसो २ बजेसम्म प्रतियोगिता हुनेछ। क्लिनिकमा विभिन्न एकेडेमी र विद्यालयबाट यू–१२, यू–१४ र यू–१६ उमेर समूहका गरी करिब १५० खेलाडीको सहभागिता रहनेछ। च्याम्पियनसिपमा यू–१४ र यू–१६ उमेर समूहका ३२ टोली सहभागी हुनेछन्। प्रतियोगिता नकआउट प्रणालीमा खेलाइनेछ। प्रत्येक टोलीमा ५ जना खेलाडी रहनेछन्, जसमा मैदानमा ३ जना खेल्नेछन् भने बाँकी २ जना वैकल्पिक खेलाडी रहने व्यवस्था हुनेछ। विजेता तथा सहभागी खेलाडीहरूलाई प्रमाणपत्र, मेडल र ट्रफी प्रदान गरिने आयोजकले जानकारी गराएको छ।
