एपीएफका प्रिन्स दाहाल र नेपाल आर्मीकी रशिला महर्जनले ४२औं राष्ट्रिय ब्याडमिन्टन प्रतियोगितामा सिंगल्स उपाधि जितेका छन्। प्रतियोगितामा आर्मीले ३ स्वर्ण जित्दै टिम च्याम्पियनको उपाधि हात पार्यो भने एपीएफले २ स्वर्ण जित्यो। प्रतियोगितामा सातै प्रदेश र तीन विभागीय टोली गरी १० टिमका १ सय १५ खेलाडीहरूले प्रतिस्पर्धा गरे। २ जेठ, काठमाडौं।
प्रिन्स दाहालले पुरुषतर्फ र रशिला महर्जनले महिलातर्फ राष्ट्रिय च्याम्पियन बनेका छन्। त्रिपुरेश्वरस्थित राष्ट्रिय खेलकुद परिषद् (राखेप) को कभर हलमा सम्पन्न पुरुष सिंगल्स फाइनलमा प्रिन्सले आर्मीका विधान अधिकारीलाई २१–१६, २१–३ को सोझो सेटमा हराएर लगातार दोस्रोपटक राष्ट्रिय च्याम्पियन बने। यसअघि २०७९ सालमा प्रिन्सले पहिलोपटक राष्ट्रिय उपाधि जितेका थिए।
महिला सिंगल्सतर्फ रशिलाले तीनपटककी राष्ट्रिय च्याम्पियन नङ्शल तामाङलाई सोझो सेटमा २१–१८, २१–१८ ले हराइन्। रशिलाको यो तेश्रो उपाधि हो। यसअघि पनि उनले २०७६ र २०७९ मा उपाधि जितेकी थिइन्। आर्मीकै अमिता गिरी र रिहाना शेरचन तेश्रो स्थानमा रहे। सिंगल्समा उपाधि जितेका प्रिन्स र रशिलाले डबल्समा पनि स्वर्ण जितेका छन्।
नेपाल ब्याडमिन्टन संघको आयोजनामा भएको प्रतियोगितामा महिला डबल्समा आर्मीकी रशिला र अमिताको जोडी विजेता बनिन्। उक्त जोडीले कोशी प्रदेशका रोजी राई र निसम सुब्बाको जोडीलाई २१–१७, २१–१७ को सेटमा पराजित गरे। पुरुष डबल्सको फाइनलमा एपीएफका प्रिन्स र देवराज राणाको जोडीले एपीएफकै भोजबहादुर गुरुङ र क्षितिज खनालको जोडीलाई २१–१०, २१–१८ ले हरायो। मिक्स डबल्समा आर्मीका विधान र अमिताको जोडी पहिलो भयो।
प्रतियोगितामा आर्मीले ३ स्वर्ण जित्दै टिम च्याम्पियनको उपाधि हात पारेको छ। आर्मीले १ लाख नगद पुरस्कारसहित टिम च्याम्पियनको ट्रफी प्राप्त गर्यो। प्रतियोगिताको अन्तिम फाइनल स्पर्धा मिक्स डबल्स आर्मीकै खेलाडीबीच हुने निश्चित भएकाले टिम च्याम्पियन बन्ने समग्र टीम त्यसअघि नै टुंगिएको थियो। विजेताहरूलाई नेपाल ओलम्पिक कमिटीका अध्यक्ष जीवनराम श्रेष्ठ, उपाध्यक्ष चतुरानन्दराज वैद्य, महासचिव राजीव श्रेष्ठ र सदस्य लाक्पा छिरिङ लामा, साथै आयोजक संघका अध्यक्ष रामजीबहादुर श्रेष्ठले एक समारोहमा पुरस्कृत गरे।
सम्बन्धित खबर
