परराष्ट्रमन्त्री शिशिर खनालले स्थानीय सरकारलाई दीर्घकालीन योजना निर्माणमा केन्द्रित हुनुपर्ने बताएका छन्। उनले टोखा–छहरे सुरुङ मार्ग विस्तार गर्दा वैकल्पिक मार्गको खोजी आवश्यक रहेको र साङ्ला खोला करिडोर विकास सम्बन्धी सुझाव दिएका छन्। ३ जेठ, काठमाडौं।
परराष्ट्रमन्त्री खनालले अल्पकालीन राजनीतिभन्दा दीर्घकालीन योजनामा स्थानीय सरकार केन्द्रित हुनुपर्ने बताएका छन्। टोखा नगरपालिकाले आज आयोजना गरेको आर्थिक वर्ष २०८३/८४ को नीति, कार्यक्रम तथा बजेट तर्जुमाका लागि सल्लाह सुझाव संकलन कार्यक्रममा उनले दीर्घकालीन योजना निर्माणमा स्थानीय सरकारको भूमिकामा जोड दिएका हुन्। उनले अब राजनीतिक लाभभन्दा माथि उठेर काम गर्ने समय आएको बताए।
‘अबको २०/२५ वर्षपछि आउने पुस्ताले पनि स्मरण गर्नेगरी काम गर्ने अवसर अहिलेको स्थानीय तहका जनप्रतिनिधिहरूमा छ, त्यसैले अल्पकालीन राजनीतिभन्दा दीर्घकालीन योजनामा केन्द्रित हुनु जरूरी छ,’ मन्त्री खनालले भने। काठमाडौं क्षेत्र न. ६ का सांसदसमेत रहेका उनले टोखाको दक्षिणी क्षेत्र घनघोर बस्तीले भरिएको र उत्तरी क्षेत्रमा खुला जमिन अझै बाँकी रहेको भन्दै व्यवस्थित शहर निर्माणमा ध्यान दिनुपर्ने बताए।
मन्त्री खनालले टोखाको ऐतिहासिक नेवारी बस्ती र शनिबार लाग्ने बजारलाई व्यवस्थित गर्दै पर्यटन प्रवर्द्धन आवश्यक रहेको बताएका छन्। उनले टोखामा घरबास ‘होमस्टे’ विकास गर्न पनि सकिने उल्लेख गरे। साथै, टोखा–छहरे सुरुङ मार्ग विस्तार गर्दा टोखाका धेरै बस्ती मापदण्डका कारण समस्या पर्न सक्ने भएकाले वैकल्पिक मार्ग खोज्न आवश्यक रहेको बताए।
सम्बन्धित खबर
