राजस्थान रोयल्सले लखनउ सुपर जायन्ट्सलाई ७ विकेटले पराजित गर्दै आईपीएल प्लेअफको सम्भावना कायम राखेको छ। युवा ब्याटर वैभव सूर्यवंशीले ३८ बलमा १० छक्का प्रहार गर्दै ९३ रनको धमाकेदार इनिङ्स खेले। राजस्थानले १९.१ ओभरमा ३ विकेट गुमाएर २२१ रन पुरा गरेको छ।
६ जेठ, काठमाडौं। सूर्यवंशीको उत्कृष्ट प्रदर्शनमा राजस्थानले २२१ रनको लक्ष्य पछ्याउँदै लखनउलाई हरायो। ध्रुव जुरेलले अविजित ५३ रन बनाएर खेल समाप्त गरे। लखनउका लागि आकाश सिंह र मोहसिन खानले १-१ विकेट लिए।
टस हारेर पहिले ब्याटिङ गरेको लखनउका लागि मिचेल मार्शले ९६ र जोश इङ्लिसले ६० रन बनाएपछि टोलीले २२०-५ को बलियो स्कोर बनाउन सफल भयो। राजस्थानका लागि यश राज पुन्जाले २ विकेट लिँदा जोफ्रा आर्चरले १ विकेट लिए। यो जितसँगै राजस्थानले १३ खेलमा १४ अंक जोडेर शीर्ष ४ भित्र स्थान बनाएको छ र प्लेअफ दौडमा जीवित रहेको छ। यदि राजस्थानले आफ्नो अन्तिम खेल जित्यो भने प्लेअफमा स्थान निश्चित गर्नेछ, चाहे चेन्नई गुजरातसँग पराजित भए पनि। लखनउ भने यसअघि नै प्रतियोगिताबाट बाहिरिइसकेको छ।
