नेपालकी ओलम्पियन धाविका सन्तोषी श्रेष्ठले १५०० मिटर दौडमा नयाँ राष्ट्रिय कीर्तिमान ४ मिनेट २७.३५ सेकेन्डमा स्थापना गरेकी छन्। उनले एकै वर्षमा सातवटा राष्ट्रिय कीर्तिमान तोड्दै ‘रेकर्ड गर्ल’ को उपाधि हासिल गरेकी हुन्। सन्तोषी भारतको झारखण्डमा आयोजना भएको २९ औं नेशनल सिनियर एथलेटिक्स फेडेरेसन प्रतियोगितामा सहभागी थिइन्।
गोल्डेन गर्ल उपनामले परिचित सन्तोषीले शनिबार १५०० मिटर दौडमा पुरानो राष्ट्रिय कीर्तिमानलाई आफ्नो नयाँ प्रदर्शनले प्रतिस्थापन गरिन्। उनले १५०० मिटर दूरी ४ मिनेट २७.३५ सेकेन्डमा पूरा गर्दै सरस्वती भट्टराईले २०१६ मा कायम गरेको ४ मिनेट ३३.९४ सेकेन्डको राष्ट्रिय कीर्तिमानलाई तोडेकी छन्। सन्तोषीले कुल ६.५९ सेकेन्डले यो कीर्तिमान सुधार गर्न सफल भइन्।
सन्तोषीका दाजु केदार श्रेष्ठका अनुसार, उनलाई एथ्लेटिक्स फेडेरेसन अफ इन्डियाले निमन्त्रणा र नेपाल एथलेटिक्स संघको सिफारिसअनुसार उक्त प्रतियोगितामा सहभागी गराइएको थियो। यसअघि उनले पोखरामा महिला ३००० मिटर दौडमा ३५ वर्ष पुरानो राष्ट्रिय कीर्तिमानलाई तोडेकी थिइन् र नयाँ रेकर्ड स्थापन गरेकी थिइन्। सन्तोषीले २०१९ मा काठमाडौंमा सम्पन्न १३ औं दक्षिण एसियाली खेलकुदमा नेपालका लागि एथलेटिक्सतर्फ पहिलो स्वर्ण पदक जित्ने महिला खेलाडीको रुपमा आफ्नो इतिहास रचेकी थिइन्।
सम्बन्धित खबर
