कोलम्बियाको टोलीले फिफा विश्वकप २०२६ का लागि रोड्रिग्वेजलाई समावेश गरेको घोषणा

फिफा विश्वकप २०२६ का लागि कोलम्बियाको अन्तिम टोली घोषणा गरिएको छ, जसमा कप्तान जेम्स रोड्रिग्वेज पनि छन्। ३४ वर्षीय मिडफिल्डर रोड्रिग्वेज यस सिजन स्वास्थ्य समस्याका कारण धेरै खेल खेल्न सक्नु भएका थिएनन्। मार्च महिनामा फ्रान्ससँगको मैत्रीपूर्ण खेलपछि उहाँ बिरामी परेर अस्पताल भर्ना हुनुभएको थियो। तर पूर्ण रूपमा स्वस्थ भएपछि उहाँलाई विश्वकप टोलीमा समावेश गरिएको हो।

कोलम्बियाले जून १ मा कोस्टारिका र जून ७ मा जोर्डनसँग मैत्रीपूर्ण खेलहरू खेल्नेछ। विश्वकपको समूह ‘के’ मा रहेको कोलम्बियाले जून १७ मा उज्बेकिस्तानसँग आफ्नो पहिलो खेल खेल्नेछ। त्यसपछि उनीहरूले डीआर कांगो र पोर्चुगलसँग प्रतिस्पर्धा गर्नेछन्।

कोलम्बियाको विश्वकप टोलीमा गोलकिपरका रूपमा कामिलो भार्गास, अल्भारो मोन्तेरो र डेभिड ओस्पिन् रहेका छन्। डिफेन्डरहरूमा डेभिन्सन सान्चेज, जोन लुकुमी, येरी मिना, विलेर डिट्टा, डानियल मुनोज, सान्टियागो आरियास, जोहान मोजिका र डेइभर माचाडो समावेश छन्। मिडफिल्डरको रूपमा रिचर्ड रियोस, जेफरसन लेर्मा, केभिन कास्टानो, जुआन कामिलो पोर्टिया, गुस्ताभो पुर्ता, जोन आरियास, होर्खे कारास्काल, जुआन फर्नान्डो क्विन्तेरो, जेम्स रोड्रिग्वेज र जामिन्टन काम्पाज छन्। फरवार्डमा जुआन कामिलो हेर्नान्डेज, लुइस डियाज, लुइस सुआरेज, कार्लोस आन्द्रेs गोमेज र जोन कोर्डोबा रहेका छन्।