मधेश सरकारले जनलोकपाल आयोगको रिक्त रहेका दुई सदस्य पदमा संजीवकुमार झा र सुजाता विमललाई नियुक्ति गरेको छ। नवनियुक्त सदस्य संजीवकुमार झा र सुजाता विमलले प्रदेश प्रमुख सुरेन्द्र लाभबाट पद तथा गोपनीयताको शपथ ग्रहण गरेका छन्। आयोग प्रभावकारी नभएको भन्दै गत पुस महिनामा सदस्य राजकिशोर साह र शोभा महतोले राजीनामा दिएको कारण ती पदहरू रिक्त भएका थिए।
१२ जेठ, जनकपुरधाम। मधेश सरकारको ठप्प बनिरहेको जनलोकपाल आयोगमा रिक्त रहेका दुई सदस्यहरु नियुक्त गरिएका छन्। आयोगमा मधेश सरकारले महोत्तरीको औरही नगरपालिका-७ का संजीवकुमार झा र महोत्तरीको श्रीपुर-८ की सुजाता विमललाई सदस्य पदमा नियुक्ति प्रदान गरेको हो। दुबै जनाले आजै प्रदेश प्रमुख सुरेन्द्र लाभबाट पद तथा गोपनीयताको शपथ लिएका छन्।
जनलोकपाल ऐन २०७७ अनुसार मुख्यमन्त्री, सभामुख र प्रतिपक्षी दलको नेताको सिफारिसमा आयोगको अध्यक्ष तथा सदस्यहरू प्रदेश प्रमुखले नियुक्त गर्ने व्यवस्था छ। मुख्यमन्त्री लालबाबु राउतको नेतृत्वमा २२ भदौ २०७८ मा अध्यक्षसहित तीन सदस्यीय आयोग गठन गरिएको थियो। तर, गठन भएको साढे चार वर्षमा आयोगको काम–कारबाही र प्रभावकारिता न्यून छ।
सुशासन कायम राख्न गठन गरिएको जनलोकपाल आयोग बेकामे भएको भन्दै २०८१ पुसमा सदस्य राजकिशोर साह र शोभा महतोले पदबाट राजीनामा दिएका थिए। आयोगमा अब अध्यक्ष रामसहायप्रसाद यादव मात्रै बचेका थिए। आयोग बेकामे भएको भन्दै विगतमा सरकारले यसको खारेजीको प्रयाससमेत गरेको थियो। तर वर्तमान तीन दलीय गठबन्धन सरकारले आगामी पाँच वर्षका लागि दुई जना सदस्य पुनः नियुक्त गरेको छ। राजनीतिक दलको कार्यकर्ता भर्ती केन्द्रको रुपमा यसको स्थापना गरेको भन्दै आलोचना पनि संगै भइरहेकै छ। यद्यपि, त्यसका बाबजुद चार वर्षमा कुनै उपलब्धि हासिल नगरेको कार्यालयमा दुई नयाँ सदस्य नियुक्त गरिएका छन्।
