नेपालमा आयोजना गरिएको काभा महिला भलिबल च्याम्पियनसिपको सेमिफाइनलमा नेपालले इरानसँग सोझो सेटमा हार व्यहोरेको छ। त्रिपुरेश्वरस्थित कभर्ड हलमा बिहीबार सम्पन्न खेलमा इरानले २५-२०, २५-१५ र २५-११ को सोझो सेटमा नेपाललाई हरायो। अब उपाधिका लागि इरान कजाखस्तानसँग प्रतिष्पर्धा गर्नेछ, जसले दोस्रो सेमिफाइनलमा भारतलाई पराजित गरेको थियो।
नेपाल सेमिफाइनलमा ३-० को सेट हारेर फाइनलमा प्रवेश गर्न असफल रहयो। घरेलु मैदानमा करिब दुई हजार दर्शकले नेपालको समर्थन गरे पनि इरानले नेपाली दर्शकहरूलाई चुप गराउँदै जित हासिल गर्यो। कजाखस्तानले बिहीबारकै पहिलो सेमिफाइनलमा भारतलाई ३-० को सेटमा हराएर फाइनलमा पुगिसकेको छ।
समूह ए का दुवै टोली सेमिफाइनलबाट पराजित हुँदा समूह बी का टोलीहरू फाइनलमा पुगेका छन्। समूह चरणमा इरानले कजाखस्तानलाई सोझो सेटमा पराजित गरेको थियो। पहिलो सेटमा नेपालले १०-८ को अग्रता लिएको थियो, तर इरानले टाइम आउट लिएर पल्टाउँदै खेलमा फर्किएर २५-२० को स्कोरमा पहिलो सेट जित्यो। दोस्रो सेटमा इरानले २५-१५ ले जित्दै २-० को अग्रता बनायो। तेस्रो सेटमा नेपालको प्रदर्शन झन् कमजोर हुँदा इरानले ८-२, १६-४, २२-९ को अग्रता बनाउँदै सजिलै सेट आफ्नो पक्षमा पार्यो।
