इरान र कजाखस्तान उपाधिका लागि भिड्दै, नेपाल र भारत तेस्रो स्थानका लागि प्रतिस्पर्धा गर्दै

काभा महिला भलिबल च्याम्पियनसिपको उपाधिका लागि आज कजाखस्तान र इरानबीच त्रिपुरेश्वरस्थित दशरथ रंगशाला कभर्डहलमा प्रतिस्पर्धा हुँदैछ। सेमिफाइनलमा कजाखस्तानले भारतलाई र इरानले नेपाललाई समान ३-० को सेटमा पराजित गर्दै फाइनलमा स्थान सुरक्षित गरेका थिए। तेस्रो स्थानका लागि आज दिउँसो १ बजे सेमिफाइनलमा पराजित भएका नेपाल र भारतबीच खेल हुनेछ।

काठमाडौंमा जारी काभा महिला भलिबल च्याम्पियनसिपको फाइनल खेल त्रिपुरेश्वरस्थित दशरथ रंगशाला कभर्डहलमा दिउँसो साढे ४ बजे शुरू हुनेछ। कजाखस्तानले भारतलाई २५-२१, २५-१७, २५-१४ को सेटमा हराएको थियो भने दोस्रो सेमिफाइनलमा इरानले नेपाललाई २५-२०, २५-१५, २५-११ को सेटमा हरायो।

साविक विजेता इरान र कजाखस्तान समूह चरणमा पनि भिडेका थिए। समूह बी को अन्तिम खेलमा इरानले कजाखस्तानलाई सोझो सेटमा हराएको थियो। फाइनलमा पनि त्यसै लयलाई कायम राख्दै च्याम्पियन बन्न इरानले लक्ष्य राखेको छ। कजाखस्तानी खेलाडी क्रिस्टिना बेलोभाले समूह चरणमा कमजोरीका कारण इरानसँग पराजित भएको बताएका छन्।

त्यस्तै तेस्रो स्थानका लागि सेमिफाइनलमा पराजित नेपाल र भारतबीच आज दिउँसो १ बजे खेल हुने छ। नेपालले समूह चरणको पहिलो खेलमै भारतसँग ३-२ को सेटमा पराजित भएको थियो। टोलीमा नयाँ खेलाडीहरू रहेका र पहिलो खेल भएकाले भारतविरुद्ध केही गल्ती भइसके पनि नेपालले अब भारतलाई हराएर तेस्रो स्थान कब्जा गर्ने लक्ष्य राखेको छ।