सद्भाव र ताराले १२औं नेपाल अन्तर्राष्ट्रिय अमेच्योर गोल्फ च्याम्पियनसिपको उपाधि जिते

नेपालका सद्भाव आचार्यले भारतका भीभान उभायकारलाई पराजित गर्दै १२औं नेपाल अन्तर्राष्ट्रिय अमेच्योर गोल्फ च्याम्पियनसिपको उपाधि रक्षा गरे। महिलातर्फ नेपालकी तारा कार्की चित्रकारले कुल स्कोर २ सय ४१ सहित स्वर्ण पदक जितिन्। प्रतियोगितामा नेपालले सर्वाधिक ३ स्वर्ण, १ रजत र १ कास्य गरी कुल ५ पदक हात पारेको छ। १५ जेठ, काठमाडौं।

साविक विजेता नेपालका सद्भाव आचार्य १२औं नेपाल अन्तर्राष्ट्रिय अमेच्योर गोल्फ च्याम्पियनसिपको उपाधि जित्न सफल भएका छन्। उनले आज इभन-पार ७२ को स्कोरसहित कुल ९-अन्डर २ सय ७ को नतिजामा भारतका भीभान उभायकारलाई ४ स्ट्रोकले पराजित गर्दै उपाधि रक्षा गरे। सद्भावले टिम र व्यक्तिगततर्फ दुई स्वर्ण जितेका छन्। गत संस्करणमा पनि उनले दुई स्वर्ण हात पारेका थिए।

आज २-अन्डर ७० को स्कोर बनाएर ५-अन्डर २ सय ११ सहित भारतका भीभान दोस्रो स्थानमा रहे। नेपालका राहुल विश्वकर्मा ३-अन्डर २ सय १३ स्कोरसहित तेस्रो भए। महिलातर्फ नेपालकी तारा कार्की चित्रकारले कुल २५-ओभर २ सय ४१ स्कोरसहित सम्झना खत्रीलाई १४ स्ट्रोकले पराजित गर्दै स्वर्ण पदक विजेता बनिन्।

प्रतियोगितामा नेपाल, भारत, श्रीलंका, बङ्गलादेश र भुटान गरी ५ दक्षिण एसियाली राष्ट्रका ५२ खेलाडी सहभागी भएका थिए। प्रतियोगिता आयोजनाका लागि विभिन्न संघ र संस्थाले सहयोग गरेका छन्।