१७ जेठ, काठमाडौं। पेरिस सेन्ट-जर्मेन (पीएसजी) ले इंग्लिस क्लब आर्सनललाई पेनाल्टी सुटआउटमा पराजित गर्दै लगातार दोस्रो पटक युरोपेली च्याम्पियन्स लिगको उपाधि जितेको छ। हंगेरीको पुस्कास एरेनामा शनिबार राति खेलेको फाइनलमा निर्धारित र अतिरिक्त समय १–१ गोलको बराबरी भएपछि खेल पेनाल्टी सुटआउटमा पुगेको थियो, जहाँ पीएसजीले ४–३ को अन्तरले विजय हासिल गर्यो। आर्सनलका डिफेन्डर ग्याब्रियलले प्रहार गरेको पेनाल्टी पीएसजीका गोलकिपर माट्भे साफोनोभले क्रसबारमाथिबाट बाहिर पारेपछि पीएसजीको जित सुनिश्चित भयो।
यस जितसँगै पीएसजी सन् २०१६ देखि २०१८ सम्म लगातार तीन पटक उपाधि जितेको रियल म्याड्रिडको पछि दोस्रो क्लब बनेको छ जसले च्याम्पियन्स लिगको उपाधि रक्षा गरेको छ। मुख्य प्रशिक्षक लुइस एनरिकको नेतृत्वमा पीएसजीले पछिल्ला ६ वटा पेनाल्टी सुटआउटमा शतप्रतिशत जितको कीर्तिमान कायम राख्दै आएको छ। गत वर्ष इन्टर मिलानलाई ५–० ले हराएर पहिलो पटक उपाधि जितेको पीएसजीले यसपटक आर्सनलको कडा चुनौतीलाई पन्छाउँदै युरोपेली फुटबलमा आफ्नो वर्चस्व पुष्टि गरेको छ। यता, २२ वर्षपछि प्रिमियर लिगको उपाधि जितेर उच्च मनोबलमा रहेको मिकेल आर्टेटाको आर्सनल भने इतिहास रच्न असफल भएको छ।
