१७ जेठ, काठमाडौं। प्रतिनिधि सभा सदस्य निर्वाचन (पहिलो संशोधन) विधेयकमा तीन वटा संशोधन प्रस्ताव प्रस्तुत गरिएको छ। यो विधेयक प्रतिनिधि सभाबाट पारित भई राष्ट्रिय सभामा पुगेको छ। राष्ट्रिय सभामा तीन वटा संशोधन प्रस्तावहरू राखिएका छन्। सांसदहरूले अपाङ्गता भएका व्यक्तिलाई अनिवार्य रूपमा उम्मेदवार बनाउनु पर्ने व्यवस्था प्रस्ताव गरेका छन्।
सांसद सुरेश कुमार आले मगर लगायतले निर्वाचनमा राजनीतिक दलहरूले उम्मेदवारी दिँदा अपाङ्गता भएका व्यक्तिहरूको प्रतिनिधित्व सुनिश्चित गर्ने व्यवस्था गर्नुपर्ने प्रस्ताव अघि प्रस्तुत गरेका छन्। सांसद पदम बहादुर परियार लगायतले उम्मेदवारको बन्द सूचीका लागि समावेशी आधारमा तालिका पछि निर्धारण गर्नुपर्ने बताएका छन्। यस अन्तर्गत राजनीतिक दलहरूले उम्मेदवारी दिँदा अपाङ्गता भएका व्यक्तिहरूको समेत प्रतिनिधित्व सुनिश्चित गर्नुपर्ने व्यवस्था गरिनुपर्ने भनिएको छ।
त्यस्तै, तराई दलितहरूलाई पनि सम्बोधन गरिनुपर्ने प्रस्ताव पनि राखिएको छ। सांसद खम्म बहादुर खाती लगायतले पनि उम्मेदवारको बन्द सूचीका लागि समावेशी आधारको स्पष्टता आवश्यक हुने प्रस्ताव राखेका छन्।
