नेपाल प्रहरीका संयोग कपालीले एलेक्स महर्जनलाई हराउँदै ४२ औं राष्ट्रिय टेबलटेनिस पुरुष सिंगल्स उपाधि जितेका छन्। एपीएफकी १८ वर्षीया योङगी पौडेलले इभाना थापालाई पराजित गर्दै पहिलो सहभागितामा महिला सिंगल्स उपाधि हात पारेकी छन्। यस प्रतियोगिताले पुरुष र महिला दुवै सिंगल्स विधामा नयाँ राष्ट्रिय च्याम्पियनको जन्म गराएको छ। १७ जेठ, काठमाडौं।
नेपाल प्रहरीका संयोग कपाली र एपीएफकी योङगी पौडेलले आइतबार सम्पन्न ४२ औं राष्ट्रिय टेबलटेनिस प्रतियोगिताको सिंगल्स उपाधि जितेका हुन्। संयोग पुरुषतर्फ र योङगी महिलातर्फ पहिलो पटक राष्ट्रिय च्याम्पियन बनेका छन्। पुरुष र महिला दुवै फाइनलमा पुगेका चारै खेलाडीहरूमध्ये जसले जित्यो, उसले नयाँ राष्ट्रिय च्याम्पियन हुने पक्का थियो।
लैनचौरस्थित राष्ट्रिय टेबलटेनिस प्रशिक्षण केन्द्रमा सम्पन्न पुरुष फाइनलमा संयोगले आफ्नो क्लबका एलेक्स महर्जनलाई ११–५, १३–११, ११–८, ११–१ को सेटमा पराजित गरे। राष्ट्रिय प्रतियोगितामा संयोगको पुरुष सिंगल्समा सबैभन्दा ठूलो उपलब्धि सेमिफाइनल पुग्नु थियो। बागमती प्रदेशका रुविन महर्जन र सुदूरपश्चिम प्रदेशका हिमाल विष्ट तेस्रो स्थानमा रहे।
महिला सिंगल्समा योङगीले उत्कृष्ट प्रदर्शन गर्दै उपाधि जितिन्। राष्ट्रिय प्रतियोगितामा पहिलो पटक सहभागी भएकी १८ वर्षीया योङगीले फाइनलमा शीर्ष दुई वरीयताकी कोशी प्रदेशकी इभाना थापालाई ११–६, ८–११, १२–१०, ११–९, ११–८ को सेटमा हराइन्। समूह चरणमा पनि योङगीले इभानालाई हराइसकेकी थिइन्।
प्रतियोगितामा सातै प्रदेश र तीन विभागीय टोली (नेपाल प्रहरी, नेपाल आर्मी, एपीएफ) गरी जम्मा १० टोलीका १ सय १६ खेलाडीले सिनियर, जुनियर र क्याडेट गरी ११ स्पर्धामा प्रतिस्पर्धा गरेका थिए। विजेताहरूलाई बनेपा नगरपालिकाका मेयर शान्तिरत्न शाक्य, अखिल नेपाल टेबलटेनिस सङ्घका अध्यक्ष वृजेन्द्रबहादुर हमाल, उपाध्यक्ष पूर्णशंकर श्रेष्ठ, महासचिव कुवेरप्रकाश सिंह, कोषाध्यक्ष ज्याकी महर्जन लगायतले एक समारोहमा पुरस्कार प्रदान गरेका थिए।
