फिफा विश्वकप २०२६ का लागि तीन आयोजना गर्ने राष्ट्रहरूमा भाग लिने ४८ टोलीका लागि ४८ फरक प्रशिक्षण स्थलहरू निश्चित गरिएको छ। सहभागी टोलीमध्ये ७ मेक्सिकोमा, २ क्यानडामा र बाँकी ३९ अमेरिकामा आफ्नो बेस क्याम्पमा रहनेछन्। प्रमुख कार्यकारी अधिकारी हाइमो शिर्गीले ‘टिम बेस क्याम्पहरू कुनै पनि फिफा विश्वकपको संरचनाका अत्यावश्यक अङ्ग हुन्’ भनी बताए। १८ जेठ, काठमाडौं।
अमेरिका, मेक्सिको र क्यानडामा आयोजना हुने फिफा विश्वकप २०२६ नजिकिँदै गर्दा सहभागी टिमहरूले आयोजक राष्ट्रहरूमा जान थालिसकेका छन्। जुन ११ देखि उत्तर अमेरिकाका तीन राष्ट्रमा सुरु हुने यो फुटबल महाकुम्भका लागि भाग लिने टोलीहरूले तयारी सुरु गरिसकेका छन् भने केही टिमहरू अझै भिसा प्राप्तिको प्रतीक्षामा छन्। विश्वकपका खेलहरु तीन राष्ट्रका १६ शहरमा आयोजना हुँदैछन्। तर मुख्य खेलअघि सहभागी ४८ राष्ट्रिय टोलीहरू आ-आफ्ना प्रशिक्षण स्थल वा टिम बेस क्याम्प (टीबीसी) मा बस्नेछन्।
तीन आयोजक राष्ट्रका लागि ४८ फरक प्रशिक्षण बेस क्याम्प निर्धारण गरिएको छ। फिफा विश्वकपको इतिहासकै सबैभन्दा ठूलो प्रतियोगितामा प्रतिस्पर्धा गर्न लागेका टोलीहरूका लागि यी बेस क्याम्पले महत्त्वपूर्ण भूमिका खेल्नेछ। प्रत्येक सहभागि टोलीले चयन गरेका ती विश्वस्तरीय प्रशिक्षण केन्द्र आफ्नो घर बाहिरको घर बन्नेछन्, जहाँ खेलाडी, प्रशिक्षक र अफिसियलहरूले समूह चरणका दौरान आफ्नो महत्वपूर्ण समय बिताउनेछन्। यी ४८ वटा प्रशिक्षण स्थलहरू विश्वकपका लागि महत्त्वपूर्ण हुनेछन्, तर यहाँ कुनै खेल आयोजना हुने छैन।
उत्तर अमेरिकामा यस्ता धेरै सहर र नगरहरू छन् जसले उत्कृष्ट पूर्वाधार र १६ आयोजक सहरहरूसँग सहज पहुँच प्रदान गर्छन्। यी समुदायहरूमा बस्ने र प्रशिक्षण लिने टोलीहरू साथै आफ्नो टिमसँग आउने प्रशंसक र सञ्चारकर्मीहरूको सहभागिताले ठूलो सामाजिक तथा आर्थिक विकासमा मद्दत पुग्ने विश्वास गरिएको छ। फिफाले धेरै स्थानका मानिसहरूले विश्वकपको उत्साह महसुस गर्न पाउने सुनिश्चित गरेको छ। फिफा विश्वकप २०२६ का प्रमुख कार्यकारी अधिकारी (सीओओ) हाइमो शिर्गीका अनुसार, टिम बेस क्याम्पहरू विश्वकपको अभिन्न अङ्ग हुन्।
‘टिम बेस क्याम्पहरू कुनै पनि फिफा विश्वकपको संरचनाका अनिवार्य घटक हुन्,’ उनले बताए। ‘यहाँ टोलीहरू बस्छन्, अभ्यास गर्दछन्, थकान मेट्छन् र प्रतियोगिताको दैनिक तालापालन अनुभव गर्छन्। फिफा विश्वकप २०२६ का लागि टिम बेस क्याम्प प्रशिक्षण स्थलहरूको अन्तिम सूची तयार हुनुले उत्साहजनक छ किनभने यसको अभूतपूर्व स्तरले यस ऐतिहासिक प्रतियोगितामा अझ बढी समुदाय र प्रशंसकहरूलाई सहभागी गराउने अवसर प्रदान गर्दछ।’
टीबीसी चयन प्रक्रिया व्यापक र सहकार्यपूर्ण थियो। सन् २०२४ मा आधिकारिक रूपमा टिम बेस क्याम्प छनोट सुरु गरिएको थियो र २०२५ मा विश्वकपको अन्तिम ड्राफ्टपछि करीब ६० विकल्पहरूबाट ४८ बेस क्याम्पहरू अन्ततः छनोट भएका हुन्। कोलम्बिया, इरान, दक्षिण कोरिया, मेक्सिको, दक्षिण अफ्रिका, ट्युनिसिया र उरुग्वेका सात टोलीहरू मेक्सिकोमा आफ्नो बेस क्याम्प राख्नेछन्। क्यानडा र पानामाका टोलीहरूले क्यानडामा प्रशिक्षण लिनेछन् भने बाँकी ३९ टोलीहरू अमेरिकामा बस्नेछन्। १६ आयोजक सहरहरू बाहेक अन्य २५ समुदायहरूले पनि राष्ट्रिय टोलीलाई प्रशिक्षण स्थलको रुपमा आतिथ्यता दिनेछन्। यसमा क्यानडाको न्यू टेकमसेथ, मेक्सिकोको कान्कुन, पाचुका र टिजुआना पर्दछन्। अमेरिकाका अलेक्जान्ड्रिया, अस्टिन, बोका रटन, चार्लोट, च्याटानुगा, कोलम्बस, गोल्टा, ग्रीनब्रियर, ग्रीन्सबोरो, इर्वाइन, मेसा, न्यासभिल, पाम बीच गार्डेन्स, पोर्टल्याण्ड, रेन्टन, सान डिएगो, स्यान्डी, सान्ता बारबरा, स्पोकेन, ट्याम्पा र विन्स्टन-सलेम रहेका छन्। यी ठाउँहरूमा विश्वकपको कुनै खेल आयोजना हुने छैन।
