पाँचौं उपत्यका व्यापी खुला जुनियर उसु प्रतियोगितामा इस्टपोल उसु क्वानले १२ स्वर्ण, ६ रजत र ६ कांस्य पदकसहित च्याम्पियनको उपाधि जितेको छ। प्रतियोगितामा अलकेमिस्ट उसु क्वानले ६ स्वर्ण, १ रजत र ५ कांस्य पदकसहित दोस्रो स्थानमा स्थान बनायो भने मनमैजु उसु क्वानले ५ स्वर्ण, ९ रजत र ८ कांस्य पदकसहित तेस्रो स्थान हासिल गर्यो। १८ जेठ, काठमाडौंमा जोरपाटी उसु क्वानको आयोजना गोकर्णेश्वर स्पोर्ट्स सिटी हलमा भएको प्रतियोगितामा यो सफलता प्राप्त भएको हो।
ईस्टपोल उसु क्वानका प्रशिक्षक विजय सिन्जालीले भने, “लगातारको मेहनत, परिश्रम र खेलाडीहरूको समर्पणले यो सफलता प्राप्त भएको हो। हाम्रो सबैभन्दा बलियो पक्ष भनेको खेलाडीहरूको अनुशासन हो।” उनले सम्पूर्ण खेलाडी, अभिभावक र आयोजक समितिलाई धन्यवाद दिए। प्रतियोगितामा व्यक्तिगत उत्कृष्टतर्फ पुरुष थाओलु विधामा अलकेमिस्ट उसु क्वानका पेमा ग्याल्बो लामा र महिला थाओलु विधामा जोरपाटी उसु क्वानकी युमी अवाल उत्कृष्ट खेलाडी घोषित भए।
जोरपाटी उसु क्वानका अध्यक्ष नारायण श्रेष्ठले यस्ता प्रतियोगिताले नयाँ खेलाडी उत्पादन र उसु खेलको विकासमा महत्वपूर्ण योगदान पुर्याउने विश्वास व्यक्त गरे।
सम्बन्धित खबर
