फिफा विश्वकपको ट्रफी केवल सुनको धातु मात्रै होइन, यो संसारभरिका अर्बौं फुटबल प्रेमीहरुको भावना, खेलाडीहरुको सपना र राष्ट्रिय गौरवको सर्वोच्च प्रतीक हो। फिफा विश्वकपको ९६ वर्षे इतिहासमा अहिलेसम्म जुल्स रिमेट र वर्तमान फिफा विश्वकप गरी दुई फरक ट्रफीहरु प्रयोग भएका छन्। इटालीका मूर्तिकार सिल्भियो गाज्जानिगाले डिजाइन गरेको वर्तमान फिफा विश्वकप ट्रफीमा १८ क्यारेट सुन प्रयोग गरिएको छ। मूल ट्रफी स्विट्जरल्यान्डको फिफा संग्रहालयमा सुरक्षित राखिन्छ र विजेता टोलीलाई हुबहु देखिने रेप्लिका मात्र प्रदान गरिन्छ। २० जेठ, काठमाडौं।
फिफा विश्वकप ट्रफी विश्व फुटबल इतिहासकै सबैभन्दा प्रतिष्ठित ट्रफी हो। हरेक चार वर्षमा विश्व फुटबलको महाकुम्भ फिफा विश्वकप आयोजना हुन्छ। यस ट्रफी जित्नका लागि फिफा विश्वकप २०२६ मा अहिलेसम्मकै धेरै ४८ राष्ट्र प्रतिस्पर्धामा उत्रने भएका छन्। विश्वका उत्कृष्ट फुटबल टोलीहरू अहिले त्यही ट्रफी जित्नका लागि मैदानमा पसिना बगाउन तयार छन्। फिफा विश्वकपको ९६ वर्षीय इतिहासमा दुई फरक ट्रफी प्रयोग भएका छन्: जुल्स रिमेट ट्रफी र फिफा विश्वकप ट्रफी।
सन् १९३० मा सुरु भएको फिफा विश्वकपको २३औं संस्करणसम्म आइपुग्दा यस ट्रफीको इतिहास, यात्रा र रोचक तथ्यहरु छन्। जुल्स रिमेट ट्रफीको इतिहास पनि अनौठो संयोगले भरिएको छ। जुल्स रिमेटको फुटबलप्रतिको ठूलो योगदान र विश्वकपको शुरुवात गर्ने उनको सपनाको सम्मानस्वरूप सन् १९४६ मा यो ट्रफी नामाकरण गरियो। ब्राजिलले सन् १९७० मा तेस्रो पटक विश्वकप जितेर ऐतिहासिक उपलब्धि हासिल गर्यो र जुल्स रिमेट ट्रफी सधैंका लागि आफ्नो बनायो। तर दुर्भाग्यवश, सन् १९८३ मा ब्राजिलको रियो दि जेनेरियोबाट यो ट्रफी चोरी भयो।
फिफाले सन् १९७४ को संस्करणका लागि नयाँ ट्रफी डिजाइनका लागि विश्वभरबाट प्रस्ताव माग्यो। इटालीका प्रसिद्ध मूर्तिकार सिल्भियो गाज्जानिगाको डिजाइन उत्कृष्ट भनिएको थियो र त्यसलाई विश्वकप ट्रफीका रूपमा छनोट गरियो। आधुनिक फिफा विश्वकप ट्रफीको भौतिक विशेषता र कलात्मक बनावट एक अनुपम नमुना मानिन्छ। यसको कुल तौल ६.१४२ किलोग्राम छ। मूल ट्रफी संसारभरिका मानिसहरुले खाली हातले छुन पाउँदैनन्। फिफाका नियम अनुसार विश्वकप विजेता टोलीका खेलाडीहरु र राष्ट्रप्रमुखहरु मात्र यी ट्रफी प्रत्यक्ष रूपमा छुन पाउने विशेष अधिकार राख्छन्।
सम्बन्धित खबर
