पश्चिम एसियामा बढ्दो द्वन्द्वले १७ लाखभन्दा बढी नेपाली वैदेशिक कामदारको रोजगारी र सुरक्षामा प्रत्यक्ष असर पर्न थालेको छ। सरकारले जोखिमपूर्ण देशमा नयाँ श्रमिक पठाउन रोक लगाएको छ भने ८० हजारभन्दा बढीले स्वदेश फर्कनको लागि नाम दर्ता गराइसकेका छन्। द्वन्द्वले वैदेशिक रोजगारीमा असर गर्दा घरेलु रोजगारी संकट बढ्ने र दलालहरूको गतिविधि सक्रिय हुने खतरा देखिएको छ। १० चैत, काठमाडौं।
पश्चिम एसियामा बढ्दो सैन्य तनावले विश्व अर्थतन्त्रसँगै नेपालको वैदेशिक रोजगारी क्षेत्रमा गम्भीर प्रभाव पार्न थालेको छ। खाडी मुलुक, इजरायल, जोर्डन, लेबनान, इरान र प्यालेस्टाइनजस्ता क्षेत्रमा लाखौं आप्रवासी श्रमिक कार्यरत छन्, जसमा २० लाखभन्दा बढी नेपाली कामदार पनि समावेश छन्। औपचारिक तथ्यांक अनुसार १७ लाख नेपाली ती देशहरूमा रहेका छन् भने अनौपचारिक रूपमा बस्नेहरू समेत जोड्दा करिब २० लाख जनाको संख्या रहेको परराष्ट्र मन्त्रालयले जनाएको छ।
द्वन्द्वले नेपाली श्रमिकको रोजगारी, आम्दानी र सुरक्षा मा प्रत्यक्ष असर देखिन थालेको छ। वैदेशिक रोजगार विभागको आर्थिक वर्ष २०८१/८२ को तथ्यांक अनुसार ८ लाख ३९ हजार २ सय ६६ जनाले वैदेशिक रोजगारीका लागि श्रम स्वीकृति लिएका थिए। यसलाई हेर्दा नेपालको मुख्य श्रम गन्तव्य मानिएका देशहरूमा भइरहेको तनावले वैदेशिक रोजगारीमा प्रत्यक्ष असर पर्ने स्पष्ट छ।
श्रम तथा आप्रवासन विज्ञ डा. जीवन बानियाँले यस्तो द्वन्द्वले वैदेशिक रोजगारीमा प्रत्यक्ष असर गर्ने सम्भावना रहेको बताएका छन्। युद्ध लम्बिएमा नेपालबाट जाने श्रमिकहरूको संख्या स्वतः घट्ने र यसले नयाँ जोखिम निम्त्याउने उनले बताए। सरकारले जोखिमपूर्ण क्षेत्रहरूमा नयाँ श्रमिक पठाउन रोक लगाएको हुँदा नेपालबाट जाने श्रमिकहरू रोकिने र विदेशमा रहेका श्रमिकहरू समेत स्वदेश फर्किनुपर्ने अवस्था आउन सक्ने उनी बताउँछन्।
सम्बन्धित खबर
