अष्ट्रेलियाको सरकारी सञ्चारमाध्यम एबीसीका कर्मचारीहरूको २४ घण्टे हड्ताल, बीबीसीका कार्यक्रमहरू प्रशारण

अष्ट्रेलियाली सरकारी सञ्चारमाध्यम एबीसीका कर्मचारीहरूले तलब वृद्धिसहितका माग राख्दै २४ घण्टे राष्ट्रिय हड्ताल सुरु गरेका छन्। यस हड्तालका कारण एबीसीको टेलिभिजन, रेडियो र डिजिटल सेवामा प्रभाव परेको छ। एबीसी टेलिभिजनले बीबीसीका कार्यक्रमहरू प्रशारण गर्न बाध्य भएको छ। रेडियो स्टेशनहरूमा पनि पुराना कार्यक्रम र संगीत मात्र बजाइएको छ।

कर्मचारीहरूले एआई प्रयोग नगर्ने सुनिश्चितता लगायतका माग राख्दै हड्ताल गरेको बताइएको छ। एबीसीका २ हजारभन्दा बढी कर्मचारीहरूले विभिन्न मागसहित यस आन्दोलन सुरु गरेका हुन्। पछिल्लो २० वर्षमा यस किसिमको पहिलो ठूलो आन्दोलन भएको गार्जियनले उल्लेख गरेको छ। तलब वृद्धिसँग सम्बन्धित मुख्य मागमा व्यवस्थापनले तीन वर्षभित्र १० प्रतिशत तलब वृद्धि गर्ने प्रस्ताव राखेको छ, तर कर्मचारीहरूले यसलाई ‘कम’ भएको प्रतिक्रिया दिएका छन्।

एबीसीकी प्रसिद्ध प्रस्तोता फ्रान केलीले सिड्नीस्थित मुख्यालय बाहिर कर्मचारीहरूको विरोध प्रदर्शनलाई सम्बोधन गर्दै भनिन्, ‘धेरै दक्ष पत्रकार र उत्पादकहरू जागिर छाड्न बाध्य भएका छन्, किनभने उनीहरू यस तलबमा सिड्नी जस्तो महँगो शहरमा बस्नु असम्भव छ।’

प्रसारणमा अवरोध आएपछि बीबीसीको सहायतामा बुधबार बिहान ११ बजेदेखि कर्मचारीहरूले काम छाडेर सडकमा प्रदर्शन गरेका कारण एबीसी न्यूज च्यानलले बाध्य भएर बीबीसी वर्ल्ड सर्भिसका कार्यक्रमहरू प्रसारण गर्न थालेको छ। एबीसीका प्रबन्ध निर्देशक ह्यु मार्क्सले भने कर्मचारीहरूको मागमा पछि नहट्ने संकेत दिएका छन्। उनले भनेका छन् कि कर्मचारी वेतनले लागत बजेटको ६० प्रतिशत ओगटेको छ र तलबमा धेरै वृद्धि गर्नुपर्ने अवस्थामा कर्मचारी कटौती गर्नुपर्ने हुन्छ भन्ने चेतावनी दिएका छन्।