पोखरा । पर्यटकीय सिजन शुरु भएसँगै पोखरा आसपासका ग्रामीण बस्तीमा आन्तरिक तथा विदेशी पर्यटकको चहलपहल बढेको छ। शहरको कोलाहलभन्दा टाढा प्रकृतिसँग रमाउन चाहने पर्यटकको रोजाइमा गाउँका होमस्टे पर्न थालेका छन्। सस्तो प्याकेज, स्थानीय खानपान, मौलिक संस्कृति र हिमशृङ्खलाको मनमोहक दृश्यले पर्यटकलाई गाउँतर्फ आकर्षित गरेको हो। दशैँ सकिएलगत्तै कास्कीका विभिन्न ग्रामीण बस्तीमा पर्यटकको आगमन बढ्दा होमस्टे सञ्चालकहरू उत्साहित भएका छन्। पोखरा महानगर आसपासका डाँडाकाँडामा रहेका होमस्टेमा स्वदेशी तथा विदेशी पाहुनाको उपस्थिति बढ्दै गएको छ। कास्कीको माछापुच्छ्रे गाउँपालिका–६ स्थित हेम्जाकोटमा पनि यतिबेला पर्यटकको चहलपहल बढेको छ। हिमश्रृङ्खलाको मनोरम दृश्य, शान्त वातावरण र गाउँको मौलिक जीवनशैलीले हेम्जाकोट आउने पर्यटकलाई आकर्षित गरिरहेको छ।

पोखरा घुम्न आउने पर्यटकसमेत नजिकैका ग्रामीण बस्तीमा पुगेर केही समय बिताउन रुचाउन थालेका छन्। ग्रामीण पर्यटन प्रवद्र्धन मञ्च (भिटोफ) का सचिव भीमराज पौडेलकाअनुसार पोखरा आउने पर्यटकलाई आसपासका गाउँसम्म पु¥याउनसके ग्रामीण पर्यटनले थप गति लिनसक्छ। प्राकृतिक सौन्दर्य र स्थानीय आतिथ्यताका कारण गाउँका होमस्टे पर्यटकको आकर्षणको केन्द्र बन्दै गएको उहाँले बताउनु भयो। होमस्टेमा अहिले पाहुनाहरुको आगमन राम्रो रहेको बताउनु भयो। हप्ताको दुई दिन बिदा भएकाले शुक्रवार र शनिवार धेरै पर्यटकहरु आउने गरेको उहाँको भनाइ छ।

पर्यटकीय सिजन शुरु भएसँगै अघिल्लो वर्षको तुलनामा यस वर्ष पाहुनाको उपस्थिति उल्लेख्य रूपमा बढेको भन्दै होमस्टे सञ्चालक उमा गुरुङ पनि खुशी हुनुहुन्छ। पर्यटकको आगमन बढ्दा स्थानीयस्तरमै आम्दानीको अवसर सिर्जना भएको उहाँको भनाइ छ। कोरोनापछि ठप्प भएको होमस्टे अहिले पुनः तंग्रिएको उहाँको भनाइ छ। गाउँमा पर्यटक पुग्न थालेपछि स्थानीय गतिविधि पनि बढेका छन्। होमस्टेमा पाहुनालाई सहज र आत्मीय अनुभव दिलाउन सञ्चालकहरूले मौलिक घर, स्थानीय परिकार, प्राकृतिक वातावरण र परम्परागत आतिथ्यतालाई प्राथमिकता दिन थालेका छन्।

पर्यटन बोर्डका सदस्य सन्तोष पोखरेलकाअनुसार गाउँमा पर्यटकको बसाइलाई सहज र आकर्षक बनाउन विभिन्न तालिम तथा प्रवद्र्धनात्मक कार्यक्रम सञ्चालन हुँदै आएका छन्। मानिसहरु प्रकृतिसँग रमाउने भएकाले पोखराका होमस्टेहरु उपयुक्त बन्दै गएको बताउनु भयो। रैथाने खानेकुराका कारण पनि गाउँ मन पर्ने गरेको उहाँको भनाइ छ। पर्यटकलाई बस्ने सुविधासँगै स्थानीय संस्कृति, मौलिक घर र खानपानको अनुभव दिलाउन सके ग्रामीण पर्यटनबाट स्थानीय समुदायले थप लाभ लिन सक्ने उहाँको भनाइ छ। दशैँपछि कास्कीका गाउँमा बढेको पर्यटकको चहलपहलले ग्रामीण पर्यटनमा नयाँ उत्साह थपेको छ। प्रकृतिसँग नजिक रहेर मौलिक जीवनशैलीको अनुभव लिन चाहने पर्यटकको आकर्षण बढ्दै जाँदा गाउँका होमस्टे स्थानीय रोजगारी र आम्दानीको महत्वपूर्ण माध्यम बन्ने अपेक्षा गरिएको छ।

काठमाडौं । बुधबार नेपाली सेयर बजारमा उत्साहजनक सुधार देखिएको छ । साताको चौथो कारोबार दिन नेपाल स्टक एक्सचेन्ज (नेप्से) परिसूचक ३३.२९ अंकले उकालो लाग्दै २ हजार ६६४ विन्दुमा पुगेको छ । यो साउन ३० गतेयताकै उच्च विन्दु हो । बजारमा परिसूचकसँगै कारोबार रकम पनि उल्लेख्य रूपमा बढेको छ । मंगलबार ५ अर्ब ८० करोड रुपैयाँ बराबरको सेयर कारोबार भएकोमा बुधबार बढेर ७ अर्ब ४५ करोड रुपैयाँ पुगेको छ । यो कारोबार रकम भदौ ३० गतेयताकै उच्च हो ।

बुधबार कारोबार भएका कम्पनीमध्ये अधिकांशको सेयर मूल्य बढेको छ । कुल २४१ कम्पनीको सेयर मूल्य वृद्धि हुँदा ३५ कम्पनीको मूल्य घटेको छ भने तीन कम्पनीको मूल्यमा कुनै परिवर्तन भएको छैन । बुधबारको कारोबारमा जलविद्युत् क्षेत्रका कम्पनीप्रति लगानीकर्ताको आकर्षण बढी देखिएको छ । जलविद्युत् समूहको परिसूचक २.०६ प्रतिशतले बढ्दै अन्य समूहलाई पछि पारेको छ । व्यापार समूहबाहेक सबै समूहगत परिसूचक सकारात्मक देखिएका छन् । बैंकिङ समूह १.३६ प्रतिशत, विकास बैंक १.११ प्रतिशत, वित्त समूह १.५५ प्रतिशत, होटल तथा पर्यटन १.३४ प्रतिशत, लगानी समूह १.५२ प्रतिशत र जीवन बीमा समूह १.५९ प्रतिशतले बढेका छन् ।

बुधबार सबैभन्दा धेरै मूल्य बढ्ने कम्पनीको सूचीमा हालै सूचीकृत बेनी हाइड्रोपावर अग्रस्थानमा रहेको छ । कम्पनीको सेयर मूल्य १५ प्रतिशतले बढेको छ । त्यस्तै, बुटवल पावर कम्पनीको सेयर मूल्य १०.६० प्रतिशतले वृद्धि भएको छ । सुपर खुदी हाइड्रोपावरको सेयर मूल्य ६.२६ प्रतिशत, एनआरएन इन्फ्रास्ट्रक्चरको ६.२२ प्रतिशत, युनियन हाइड्रोपावरको ५.८६ प्रतिशत र सान्जेनको ५.८१ प्रतिशतले बढेको छ ।

समग्रमा बुधबारको कारोबारले सेयर बजारमा सकारात्मक माहोल देखाएको छ । परिसूचक र कारोबार रकम दुवै बढ्नुका साथै अधिकांश कम्पनीको सेयर मूल्य उकालो लाग्दा बजारमा खरिद चाप बढेको संकेत मिलेको छ । विशेषगरी जलविद्युत् क्षेत्रमा देखिएको सक्रियताले बुधबारको बजार वृद्धिमा महत्त्वपूर्ण योगदान पुर्‍याएको छ । यद्यपि, एक दिनको वृद्धिलाई मात्र आधार मानेर बजारको आगामी दिशा निश्चित गर्न सकिँदैन ।