काठमाडौं । एसीसी यू–१९ एसिया कप क्रिकेटमा नेपाल भारतसँग १० विकेटले पराजित भएको छ । ओमानको अल अमेरात क्रिकेट मैदानमा शुक्रबार कात्तिक २० गते भएको खेलमा नेपालले दिएको १२९ रनको लक्ष्य भारतले १९.१ ओभरमा बिनाविकेटको क्षतिमा पूरा गरेको हो । भारतका लागि आर्यभिर सेवाङले ५२ बलमा सात चौका र चार छक्कासहित अविजित ७० रन बनाए । अर्का ओपनर लक्ष्य रैचदनीले ६३ बलमा सात चौकाको मद्दतमा अविजित ५३ रन जोडे ।
यसअघि टस हारेर ब्याटिङ गरेको नेपाल ४२.३ ओभरमा १२८ रनमा समेटिएको थियो । नेपालका दर्श सोनारले सर्वाधिक ४३ रन बनाए । उनले ९३ बल खेल्दै एक चौका र एक छक्का प्रहार गरे । आशिष लुहारले ४५ बलमा २९ रन र नीरजकुमार यादवले ४८ बलमा २० रन जोडे । अन्य नेपाली ब्याटरले दोहोरो अंकमा रन बनाउन सकेनन् । भारतका इशान सूदले १० ओभरमा १८ रन खर्चेर तीन विकेट लिए । अर्जुन राजपूतले ५.३ ओभरमा आठ रन दिँदै तीन विकेट हात पारे । शवीर गौडले दुई तथा मनाल चौहान र काव्या परेश पटेलले समान एक विकेट लिए । समूह ‘ए’मा रहेको नेपालले अब कात्तिक २२ गते युनाइटेड अरब इमिरेट्स (यूएई)सँग प्रतिस्पर्धा गर्नेछ ।

काठमाडौं । पोर्चुगलका स्टार फुटबलर क्रिस्टियानो रोनाल्डोले अन्तर्राष्ट्रिय फुटबलबाट संन्यास घोषणा गरेका छन् । ४१ वर्षीय रोनाल्डोले बिहीबार इन्स्टाग्राममा लामो भिडियो सन्देश सार्वजनिक गर्दै राष्ट्रिय टोलीबाट बिदा लिने घोषणा गरेका हुन् । भिडियोमा समर्थकका नाममा लेखिएको पत्र पढ्दै उनले पोर्चुगलको सात नम्बर जर्सी हस्तान्तरण गर्ने समय आएको बताएका छन् ।

रोनाल्डोले उक्त जर्सीलाई आफ्नो मात्र नभई राष्ट्रिय टोलीको साझा पहिचानका रूपमा लिएको उल्लेख गरेका छन् । उनले २३ वर्षसम्म पोर्चुगलको सात नम्बर जर्सी लगाउन पाउनुलाई विशेष अवसर र जिम्मेवारीका रूपमा स्मरण गरे । पोर्चुगलबाट कीर्तिमानी अन्तर्राष्ट्रिय करिअर बिताएका रोनाल्डोको घोषणासँगै राष्ट्रिय टोलीसँगको उनको लामो यात्रा टुंगिएको छ ।

काठमाडौं । नेपाल प्रिमियर लिग (एनपीएल) अन्तर्गत बिहीबार भएको खेलमा लुम्बिनी लायन्सले जनकपुर बोल्ट्सलाई १६ रनले पराजित गरेको छ । यस जितसँगै लुम्बिनीले अपराजित यात्रा कायम राख्दै अंकतालिकाको शीर्ष स्थानमा आफ्नो पकड बलियो बनाएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको लुम्बिनीले निर्धारित २० ओभरमा आठ विकेट गुमाउँदै १४९ रन बनाएको थियो । लुम्बिनीका लागि कप्तान रोहितकुमार पौडेलले सर्वाधिक ३४ रनको योगदान दिए । जनकपुरका विशाल सुस्लिङ र राहुल यादवले समान दुई–दुई विकेट लिए ।

जितका लागि १५० रनको लक्ष्य पछ्याएको जनकपुर निर्धारित २० ओभरमा १३३ रनमा सीमित भयो । लुम्बिनीको लगातारको जित रोक्न नसक्दा जनकपुरले १६ रनको हार बेहोर्नुपर्‍यो । यसैबीच, बिहीबार साँझ ५ बजे हुने दोस्रो खेलमा विराटनगर किंग्स र काठमाडौं गोर्खाजबीच प्रतिस्पर्धा हुनेछ ।

काठमाडौं । राजधानीमा जारी तेस्रो संस्करणको नेपाल प्रिमियर लिग (एनपीएल) मा अर्धशतकको संख्या १० पुगेको छ। विराटनगर किङ्ग्सका आन्द्रे रसेलले जनकपुर बोल्ट्सविरुद्ध २८ बलमा अर्धशतक पूरा गरेसँगै यो संख्या दोहोरो अंकमा पुगेको हो। आक्रामक ब्याटिङ गरेका रसेलले ५० रन पूरा गर्ने क्रममा पाँच छक्का र दुई चौका प्रहार गरे।

सोही खेलमा विराटनगरका इमरान शेख र लोकेश बमले पनि अर्धशतक बनाए। इमरानले ४० बलमा र लोकेशले ३९ बलमा अर्धशतक पूरा गरेका हुन्। लोकेशको भने जारी प्रतियोगितामा यो दोस्रो अर्धशतक हो। यसअघि उनले कर्णाली याक्सविरुद्ध ३२ बलमा अर्धशतक बनाएका थिए।

प्रतियोगिताको पहिलो अर्धशतक चितवन राइनोजका डेभिड मलानले विराटनगरविरुद्ध ४१ बलमा पूरा गरेका थिए। त्यसपछि सुदूरपश्चिम रोयल्सका कप्तान दीपेन्द्रसिंह ऐरीले पोखरा एभेन्जर्सविरुद्ध ३६ बलमा र जनकपुरका मोइन अलीले काठमाडौं गोर्खाजविरुद्ध ४९ बलमा अर्धशतक बनाएका थिए। त्यस्तै, कर्णालीका कप्तान सोमपाल कामीले विराटनगरविरुद्ध २७ बलमा अर्धशतक पूरा गरेका थिए। जनकपुरका तृतराज दासले पोखराविरुद्ध ५१ बलमा तथा काठमाडौंका राशिद खानले कर्णालीविरुद्ध ३२ बलमा अर्धशतक बनाएका थिए। पछिल्लो खेलमा विराटनगरका तीन ब्याटरले अर्धशतक बनाएसँगै प्रतियोगितामा व्यक्तिगत अर्धशतकको कुल संख्या १० पुगेको छ।

काठमाडौं । सलिको गल्फ प्रतियोगिता आगामी शनिबार गोकर्ण फरेस्ट रिसोर्टको गल्फ कोर्समा आयोजना हुने भएको छ। सगरमाथा लुम्बिनी इन्स्योरेन्स कम्पनी लिमिटेड (सलिको) द्वारा आयोजित एकदिने प्रतियोगितामा करिव एक सय एमेच्योर गल्फरले प्रतिस्पर्धा गर्नेछन्। आयोजक सलिकोले त्रिपुरेश्वरस्थित नेपाल खेलकुद पत्रकार मञ्च (एनएसजेएफ) मा बुधबार पत्रकार सम्मेलन गर्दै प्रतियोगिताबारे जानकारी दिएका छन्। नेपाली कर्पोरेट क्षेत्रका खेलाडीको सहभागिता रहने गोकर्ण गल्फ कोर्सको डाइरेक्टर दीपक आचार्यले जानकारी दिए।

प्रतियोगिता कुल १८ होलको पार ७२ कोर्समा हुनेछ। प्रतियोगिताको पार थ्री को दशौं होलमा होल इन वान गर्ने पहिलो खेलाडीले टाटा नेक्सन गाडी प्राप्त गर्नेछन्। यो पुरस्कार प्रतियोगिताको मुख्य आकर्षण रहेको छ। कर्पोरेट प्रतियोगिता भएकाले नगद पुरस्कार नहुने भएको छ। पुरुषतर्फ विजेता र उपविजेता, बेस्ट ग्रस, महिलामा विजेता र उपविजेता, ६० वर्षमाथिका खेलाडीबीच सिनियर विजेता तथा ७० वर्षमाथिका खेलाडीबीच सुपर सिनियर विजेतालाई पुरस्कृत गरिनेछ। मोस्ट बर्डिज, क्लोजेस्ट टु द पिन, लङ्गेस्ट ड्राइभ र ‘सलिको ३० वर्षको विश्वास’ विधामा पनि पुरस्कार प्रदान गरिने आयोजकले जनाएको छ।

सलिकोका प्रमुख कार्यकारी अधिकृत (सिइओ) चन्की क्षेत्रीले सलिको गल्फ प्रतियोगिता २०२६ आयोजना गर्न पाउँदा खुशी व्यक्त गर्दै प्रतियोगिताले सरोकारवालाहरू तथा बृहत् कर्पोरेट समुदायसँगको सम्बन्धलाई थप सुदृढ बनाउने बताए। ‘यस्ता खेलकुद प्रतियोगिता प्रतिष्पर्धामा मात्र सिमित हुँदैनन्। यसले सौहार्दपूर्ण सम्बन्ध विकास गर्न, व्यावसायिक सम्बन्धलाई बलियो बनाउन तथा साझा मूल्य, इमानदारी, खेल भावना र पारस्परिक सम्मानका माध्यमबाट मानिसहरूलाई एकै ठाउँमा ल्याउन महत्वपूर्ण भूमिका खेल्छ,’ उनले भने।

चितवन । चितवनमा पहिलोपल्ट हुन लागेको अन्तर्राष्ट्रिय खुला तेक्वान्दो च्याम्पियनसिप कात्तिक १३ गतेदेखि आयोजना हुने भएको छ। चितवन तेक्वान्दो डोजाङको आयोजनामा प्रथम सौराहा अन्तर्राष्ट्रिय खुला तेक्वान्दो च्याम्पियनसिप २०२६ यसै कात्तिक १३ देखि १५ गतेसम्म हुने भएको हो। चितवनमा पहिलोपल्ट यति ठुलो अन्तर्राष्ट्रिय प्रतियोगिता आयोजना हुन लागेको चितवन तेक्वान्दो डोजाङका प्रमुख रोशन खानले जानकारी दिए। चितवनस्थित राप्ती नगरपालिकाको भण्डारामा आयोजकले पत्रकार सम्मेलन आयोजना गर्दै प्रतियोगिताबारे जानकारी दिएको हो।

नेपालका सातवटै प्रदेशसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानलगायतका करिब आठ सय खेलाडीले प्रतियोगितामा प्रतिस्पर्धा गर्ने अन्तर्राष्ट्रिय संयोजक अशोक खड्काले जानकारी दिए। च्याम्पियनसिपमा पुम्से र ग्योरोगी विधाअन्तर्गत विभिन्न उमेर तथा तौलसमूहमा प्रतिष्पर्धा हुनेछ। रत्ननगरपालिकास्थित सौराहको रत्ननगर सभाहलमा खेल हुने भएको छ।

चितवन तेक्वान्दो डोजाङका रोशन खानले चितवनमा तेक्वान्दो खेलको विकास गर्ने र नेपाली खेलाडीलाई राष्ट्रिय तथा अन्तर्राष्ट्रिय प्रतिस्पर्धाको अवसर दिने उद्देश्यले सौराहा अन्तर्राष्ट्रिय खुला तेक्वान्दो च्याम्पियनसिप आयोजना गर्न लागिएको बताए। टिम च्याम्पियनले ५० हजार रुपैयाँ, दोस्रो हुनेले ३० हजार र तेस्रो हुने टोलीले २० हजार रुपैयाँ पुरस्कार प्राप्त गर्नेछन्। प्रतियोगिताका संयोजक प्रज्वल दवाडीले ग्यरोगीतर्पm सब जुनियर (९–११ वर्ष), क्याडेट (१२–१४ वर्ष), जुनियर (१५–१७ वर्ष) र सिनियर (१८ वर्षमाथि) तथा पुम्सेमा गरी कुल ६४ स्वर्ण, ६४ रजत र १२८ कांस्य पदकका लागि प्रतिष्पर्धा हुने बताए।

नेपाल तेक्वान्दो संघ, बागमती प्रदेश तेक्वान्दो संघ र चितवन जिल्ला तेक्वान्दो संघको सहयोग तथा समन्वयमा उक्त च्याम्पियनसिप हुँदै छ। प्रतियोगिताका अन्तर्राष्ट्रिय संयोजक अशोक खड्काले उत्कृष्ट पुम्से पुरुष, उत्कृष्ट पुम्से महिला, उत्कृष्ट ग्योरोगी पुरुष, उत्कृष्ट ग्योरोगी महिला, उत्कृष्ट प्रशिक्षक र उत्कृष्ट रेफ्रीलाई जनही १०० अमेरिकी डलर पुरस्कार प्रदान गरिने जानकारी दिए। राष्ट्रिय तथा अन्तर्राष्ट्रिय खेलाडीबीच प्रतिष्पर्धा गराउँदै उनीहरूको क्षमता अभिवृद्धि र अनुभव आदानप्रदान गर्ने लक्ष्य आयोजकको छ। साथैे खेलमार्पmत सौराहाको पर्यटन प्रवद्र्धनसँग पनि जोड्ने बताइएको छ। सौराहालाई खेलकुद पर्यटनको गन्तव्यका रूपमा स्थापित गर्ने र चितवनको पहिचान अन्तर्राष्ट्रियस्तरमा विस्तार गर्ने लक्ष्य राखिएको आयोजकको भनाइ छ।