काठमाडाैं । कर्णाली याक्सलाई ३९ रनले पराजित गर्दै सुदूरपश्चिम रोयल्स नेपाल प्रिमियर लिग (एनपिएल) को अंकतालिकामा दोस्रो स्थानमा उक्लिएको छ। कीर्तिपुरस्थित त्रिवि क्रिकेट मैदानमा आज भएको पहिलो खेलमा जित निकालेसँगै सुदूरपश्चिम छैटौँ स्थानबाट दोस्रोमा पुगेको हो। पाँच खेलमा तीन जित र दुई हारसहित उसको ६ अंक भएको छ। चार खेलमा समान दुई जित र हार बेहोरेको कर्णाली भने ४ अंकसहित पाँचौँ स्थानमा झरेको छ।
सुदूरपश्चिमले दिएको १७७ रनको लक्ष्य पछ्याएको कर्णालीले निर्धारित २० ओभरमा सात विकेट गुमाएर १३७ रन मात्र बनाउन सक्यो। कर्णालीका लागि डेविड मिलरले आक्रामक ब्याटिङ गर्दै अविजित ९३ रन बनाए पनि टोलीलाई जित दिलाउन सकेनन्। उनले ५४ बलमा पाँच चौका र सात छक्का प्रहार गरे। दीपक डुम्रेले १८ रन जोड्दा अन्य ब्याटरले दोहोरो अंकमा रन बनाउन सकेनन्। सुदूरपश्चिमका स्कट कुगेलाइनले दुई विकेट लिए।
यसअघि टस हारेर ब्याटिङको निम्तो पाएको सुदूरपश्चिमले निर्धारित २० ओभरमा छ विकेट गुमाउँदै १७६ रन बनाएको थियो। ओपनर सैफ जैव र विनोद भण्डारीले पहिलो विकेटका लागि ७.३ ओभरमा ६८ रनको साझेदारी गर्दै टोलीलाई राम्रो सुरुवात दिलाए। विनोद २२ बलमा दुई चौका र दुई छक्कासहित २७ रन बनाएर रनआउट भए। सैफले २४ बलमा चार चौका र एक छक्काको मद्दतमा ३५ रन जोडे।
प्रतियोगिताअन्तर्गत आज साँझ ५ बजे चितवन राइनोज र पोखरा एभेन्जर्सबीच खेल हुनेछ।
सम्बन्धित खबर
