समाचार सारांश ह्वाट्सएपले टेक्स्ट मेसेजमा पनि एकपटक पढेपछि स्वतः मेटिने ‘आफ्टर रिडिङ’ फिचर ल्याउने तयारी गरेको छ। विश्वभर करिब ३ अर्ब ३० करोड सक्रिय प्रयोगकर्ता भएका लोकप्रिय मेसेजिङ प्लेटफर्म ह्वाट्सएपले एक नयाँ र बहुप्रतिक्षित गोपनीयता सुविधा ल्याउने तयारी गरेको छ। अहिले सम्म यो सुविधा केवल फोटो र भिडियोमा सीमित रहेको ‘भ्यू वन्स’ फिचर अब टेक्स्ट मेसेजमा पनि उपलब्ध हुनेछ। यसको अर्थ, ह्वाट्सएपमा मेसेज एक पटक पढेपछि त्यो मेसेज आफैं स्वतः मेटिनेछ।
डब्लुए बेटाइन्फोको रिपोर्ट अनुसार, ह्वाट्सएपको नयाँ बीटा संस्करणमा आफ्टर रिडिङ नामक फिचर देखिएको छ, जुन हालको ‘डिसएपियरिङ मेसेज’ भन्दा फरक र उन्नत हुनेछ। यसमा मेसेज पढ्ने बित्तिकै तुरुन्तै गायब हुन्छ र कुनै निश्चित समय कुर्नु पर्दैन। हाल डिसएपियरिङ मेसेजका लागि ह्वाट्सएपमा २४ घण्टा, ७ दिन वा ९० दिनको विकल्प उपलब्ध छ। तर, आफ्टर रिडिङ फिचर सक्रिय भएपछि मेसेज पढ्ने बित्तिकै च्याट बक्सबाट नै मेटिनेछ। यो सुविधा भ्यू वन्सजस्तै फोटो/भिडियोका लागि उपलब्ध छ।
प्रारम्भिक परीक्षणमा, मेसेज पढिएपछि १५ मिनेट भित्र पठाउने र प्राप्त गर्ने दुवैको ह्वाट्सएप इनबक्सबाट स्थायी रूपमा मेटिन्छ। यदि मेसेज पढिएको छैन भने पनि त्यो २४ घण्टासम्म च्याटमा रहनेछ र त्यसपछि आफैं मेटिनेछ। यो सुविधा खासगरी OTP, पासवर्ड, बैंक डिटेल्स जस्ता संवेदनशील सूचनाहरू सेयर गर्दा धेरै उपयोगी हुनेछ। यसले प्रयोगकर्तालाई ‘डिलिट फर एभ्रिवन’ जस्ता विकल्पबाट म्यानुअली मेसेज मेटाउनुपर्ने झन्झट पनि कम गर्ने अपेक्षा गरिएको छ।
आईफोन प्रयोगकर्ताका लागि अनुवाद सुविधा त्यसैगरी, मेटा प्लेटफर्मले आइफोन प्रयोगकर्ताका लागि इनबिल्ट च्याट ट्रान्सलेसन फिचर पनि परीक्षण गरिरहेको छ। यस सुविधाले २१ भन्दा बढी भाषामा ह्वाट्सएप मेसेज तुरुन्तै अनुवाद गर्न सकिनेछ। यो अनुवाद प्रणाली डिभाइसमै चल्ने भएकाले प्रयोगकर्ताको गोपनीयतामा पनि ध्यान दिइएको छ। हाल डिजिटल गोपनीयताको महत्व बढ्दो क्रममा छ। सिग्नल र टेलिग्रामजस्ता एपहरूले पनि सेल्फ-डिस्ट्रक्टिङ मेसेज र एन्ड-टु-एन्ड इन्क्रिप्सनलाई प्राथमिकता दिँदै आएका छन्। यस्तै प्रतिस्पर्धात्मक बजारमा ह्वाट्सएपले पनि आफ्ना फिचरहरूलाई अझ सुरक्षित र प्रयोगकर्तामैत्री बनाउँदै लगिरहेको देखिन्छ। यो नयाँ फिचर हाल एन्ड्रोइड बीटा संस्करण (२.२६.१२.२) मा परीक्षण भइरहेको छ र अझै विकासको चरणमा छ। परीक्षण सफल भएपछि निकट भविष्यमा सबै प्रयोगकर्ताका लागि सार्वजनिक गरिने अपेक्षा गरिएको छ। यो फिचर ह्वाट्सएप प्रयोगकर्ताको गोपनीयता सुरक्षामा अत्यन्त उपयोगी हुनेछ।
