१९ चैत, काठमाडौं । तेह्रथुमको लालिगुराँस नगरपालिकामा दुईवटा घोडालाई अत्यन्तै निर्ममतापूर्वक कुटेको भिडियो सामाजिक सञ्जालमा भाइरल भएको छ। उक्त घटनामा एक घोडा मालिकले घोडाहरू ठीकसँग हिँडेनन् भनेर लठ्ठीले अत्यधिक कुटपिट गरेको देखिन्छ। घोडालाई अमानवीय तरिकाले कुटिरहेको बेला एक महिलाले लठ्ठी लिन खोज्दा उनलाई पनि रिसले हान्ने प्रयास गरेको भिडियोमा देखिएको छ। घटनास्थलमा नगर प्रहरी पनि उपस्थित थिए तर उनीहरूले कुनै हस्तक्षेप नगरेको स्थानीयबासीहरूको गुनासो छ। ‘नगर प्रहरीले रोक्नुपर्नेमा वास्ता गरेनन्’ भन्दै स्थानीयहरूले सामाजिक सञ्जालमा आक्रोश व्यक्त गरेका छन्।
नगरप्रमुख अर्जुन माबोहाङ के भन्छन् ? भाइरल भिडियोपछि लालिगुराँस नगरपालिकाका प्रमुख अर्जुन माबोहाङसँग फोनमा कुराकानी भएको छ। उनले घटनाको भोलिपल्टै घोडा कुट्ने व्यक्तिसँग स्पष्टीकरण सोधिएको जानकारी दिए। ‘हामीले स्पष्टीकरण लिएका छौं’ नगरप्रमुख माबूहाङले भने, ‘प्रहरीले घटनाको भोलिपल्टै उनलाई पक्राउ गरिसकेको छ। मुद्दा चलाउने तयारी भइरहेको छ।’ माबूहाङका अनुसार ती व्यक्तिले घोडाले टोक्न खोजेपछि पिटेको स्पष्टीकरण दिएका छन्। नगरप्रमुखले नगर प्रहरीको भूमिकाप्रति पनि ध्यानाकर्षण गराए। ‘नगरप्रहरीहरूले यस्ता घटनामा संयमित हुनुपर्छ र रोक्नुपर्छ’ उनले भने, ‘मैले पहिले पनि पशुपन्छीमाथि हुने क्रूर व्यवहार रोक्न भनेको थिएँ, फेरि एकपटक समन्वय आवश्यक छ।’
माबूहाङका अनुसार ती व्यक्ति ५५–५६ वर्षका बुढा मान्छे हुन्। ‘घोडा पनि थाकेको थियो, उनी पनि थाकेका थिए होला। यस्तो अवस्थामा घोडा हिँडेन भनेर त्यसरी कुटपिट गर्न हुँदैन’ माबूहाङ भन्छन्, ‘मान्छे मात्र होइन, घोडा पनि थाक्छ भन्ने कुरा बुझ्न जरुरी छ।’
के हुन्छ कारबाही ? नेपालमा पशुमाथि क्रूर व्यवहार गर्नेहरूलाई पशुपन्छी सम्बन्धी कसूर तथा सजाय ऐन अनुसार कारबाही गरिन्छ। यस ऐन अनुसार कसैले पशुमा अनावश्यक पीडा दिने, कुटपिट गर्ने वा अमानवीय व्यवहार गरेमा त्यहीं कसूर मानिन्छ। यदि यस्तो कसूर प्रमाणित भयो भने दोषीलाई जरिवाना, कैद वा दुवै सजाय हुन सक्छ। साथै, पशु संरक्षणको दायित्व पूरा नगरे वा लापरवाही गरेको ठहरिएमा पनि कानुनी कारबाही गरिन्छ। त्यसैले घोडा कुट्ने जस्तो घटना कानुनअनुसार दण्डनीय छ र अनुसन्धानपछि सम्बन्धित व्यक्तिलाई उचित सजाय गरिन्छ।
