१९ चैत, काठमाडौं । नेकपा एमालेका उपाध्यक्ष विष्णु पौडेलले पार्टी संसदीय दलका नेता रामबहादुर थापा ‘बादल’को अभिव्यक्तिप्रति आपत्ति जनाएको छन्। थापाले बिहीबार प्रतिनिधिसभा बैठकमा सम्बोधन गर्दै जेनजी आन्दोलन र रास्वपासम्बन्धी कटाक्ष गरेका थिए। पौडेलले उक्त अभिव्यक्तिप्रति आपत्ति व्यक्त गर्दै भनेका छन्, ‘प्रतिनिधि सभाको आजको बैठकमा नेकपा (एमाले) को दल नेताको हैसियतमा माननीय रामबहादुर थापाले व्यक्त गर्नुभएको विचार पार्टीका स्थापित नीति र मान्यतासँग विपरीत छ।’
पौडेलले थापाका अभिव्यक्तिप्रति भोलि हुने केन्द्रीय समितिको बैठकमा छलफल र निर्णय हुने अपेक्षा गरेका छन्। उनले थप भनेका छन्, ‘यस विषयमा भोलि आयोजना गरिएको नेकपा (एमाले) को केन्द्रीय सचिवालय बैठकमा गम्भीरतापूर्वक छलफल हुनेछ र उपयुक्त निर्णय हुनेछ भन्ने आशा राख्छु।’ थापाले जेनजी आन्दोलन, नेपाली सेना र सुशीला कार्की नेतृत्वको सरकारलाई प्रश्न गरेका थिए। उनले भनेका थिए, ‘यो अवस्था ल्याउनमा मुख्य भूमिका खेलेको र संविधान निर्माणमा सहकार्य गरेको दल नेकपा एमाले अहिले सरकारको विपक्षी दल नभएर राज्यपक्षीय दल हो।’
