आर्टिमिस २ : अन्तरिक्षयात्रीहरूले चन्द्रमाको बीच बाटोमा पुगेर पृथ्वीको ‘शानदार’ तस्बिर खिचे

‘आर्टिमिस २’ का अन्तरिक्षयात्रीहरूले चन्द्रमाको आधा बाटोमा पुग्दा खिचिएको पृथ्वीको ‘शानदार’ उच्च गुणस्तरको तस्बिर नासाले सार्वजनिक गरेको छ। पृथ्वीको सबैभन्दा नजिकको खगोलिय छिमेकीतर्फको मार्गमा पुगेपछि उक्त अन्तरिक्ष अभियानका कमाण्डर रिड वाइजमनले त्यो फोटो खिचेको नासाले जनाएको छ। आधा बाटो तय शनिबार नेपाली समयअनुसार करिब पौने बाह्र बजे, नासाको ड्यासबोर्डमा उक्त ओरिअन अन्तरिक्षयान पृथ्वीबाट २२८,५०० किलोमिटर टाढा पुगेको र चन्द्रमाबाट करिब २१२,४०० किलोमिटरको दूरीमा रहेको देखियो। अन्तरिक्षयात्री क्रिस्टिना कोखले पृथ्वीबाट २ दिन, ५ घण्टा र २४ मिनेटपछि आधा बाटो पुगेको जानकारी पाएपछि यानमा सवार सबैले ‘खुसी’ व्यक्त गरेका थिए।

‘हेलो, वर्ल्ड’ नाम दिइएको पहिलो फोटोमा विशाल नीलो भाग देखिन्छ जुन आन्ध्र महासागर हो। त्यसमा पृथ्वीले सूर्यलाई छेक्दा वायुमण्डलको तेज र दुई ध्रुवतिर हरिया अरोरा देखिन्छ। फोटोमा पृथ्वी उल्टो देखिन्छ, जहाँ पश्चिम सहारा र आइबेरियन प्रायद्वीप बायाँपट्टि तथा दक्षिण अमेरिकाको पूर्वी भाग दायाँपट्टि देखिन्छ। दायाँ तलतिर देखिने चम्किलो ग्रह बुध रहेको नासाले पहिचान गरेको छ। अन्तरिक्षयात्रीहरूले शुक्रबार ‘ट्रान्स-लुनार इन्जेक्सन बर्न’ प्रक्रियालाई सफलतापूर्वक सम्पन्न गरेपछि फोटोहरू खिचिएका हुन्।

त्यो प्रक्रियाले ओरिअन अन्तरिक्षयानलाई पृथ्वीको कक्षबाट निकालेर त्यसमा सवार चार जना अन्तरिक्षयात्रीहरूलाई चन्द्रमा तर्फ ल्याएको छ। आर्टिमिस २ अब यात्रुलाई चन्द्रमाको टाढो भागसम्म पुर्‍याउने र फेरि फर्काउने काम गर्नेछ। पचास वर्षपछि यस्तो यात्रा सन् १९७२ पछि पहिलो पटक हो जब मानिसले पृथ्वीको कक्षभन्दा बाहिर यात्रा गर्न लागेको हो। अमेरिकाको फ्लोरिडास्थित केनेडी स्पेस सेन्टरबाट प्रक्षेपण गरिएको यो अन्तरिक्षयानले एप्रिल ६ मा चन्द्रमाको टाढो भाग हुँदै गुज्रनेछ र एप्रिल १० मा प्रशान्त महासागरमा अवतरण गर्नेछ।