२२ चैत, लुम्बिनी । प्रधानसेनापति अशोकराज सिग्देलले नेपाली सेनाले आफ्नो ऐतिहासिक परम्परालाई निरन्तरता दिँदै अगाडि बढिरहेको बताएका छन्। आइतबार बुटवलमा आयोजित भूतपूर्व सैनिक सम्मेलनमा सम्बोधन गर्दै उनले सेनालाई वर्तमान र भविष्यका चुनौतीहरू सामना गर्न सक्षम बनाउन, थप विकास गर्दै भावी पुस्तामा हस्तान्तरण गर्नु सबैको साझा जिम्मेवारी रहेको बताए।
सिग्देलले देशको सार्वभौमिकता रक्षाका लागि सेनाले निर्वाह गरेको भूमिकासहित आन्तरिक सुरक्षा, विकास निर्माण, विपद् व्यवस्थापन र अन्तर्राष्ट्रिय शान्ति स्थापनाका कार्यहरूले नेपाली सेनालाई स्वदेश तथा विदेशमा विश्वसनीय र सम्मानित संस्था बनाएको बताए। हालै सम्पन्न आम निर्वाचनलाई सुरक्षित र भयरहित वातावरणमा सम्पन्न गराउन नेपाली सेनाले देखाएको उच्च पेशागत दक्षता, व्यावसायिकता र कार्यकुशलताको सर्वत्र प्रशंसा भएको उनले बताउनुभयो।
‘हामीसँग हाम्रा वीर पुर्खाले देखाउनु भएको त्याग, तपस्या, बलिदान, कर्तव्यपरायणता र अटल राष्ट्रभक्तिले गर्विलो र जीवन्त इतिहास आरक्षित गरेको छ’, सिग्देलले भन्नुभयो, ‘सैनिक अनुशासन, कमान्डको साख, संगठनको अराजनीतिक चरित्र, एकता भावना र संगठनात्मक लक्ष्यप्रति समर्पणले हाम्रो इतिहासलाई थप गौरवशाली बनाएको छ।’
सम्बन्धित खबर
