समाचार सारांश पश्चिमी न्यून चापीय प्रणाली र स्थानीय वायुको प्रभावले काठमाडौं उपत्यका लगायत देशका विभिन्न क्षेत्रमा वर्षा भएको छ। जल तथा मौसम पूर्वानुमान महाशाखाले मेघगर्जन, चट्याङ, हुरी र असिनासहित मध्यम वर्षा तथा हिमपात हुने सम्भावना रहेको जनाएको छ। महाशाखाले मधेश, कोशी र बागमती प्रदेशका तराईका स्थानहरूमा सतर्कता अपनाउन सर्वसाधारण र यातायात सञ्चालनकर्तालाई आग्रह गरेको छ। २५ चैत, काठमाडौं । पश्चिमी न्यून चापीय प्रणाली र स्थानीय हावाको प्रभावले काठमाडौं उपत्यका लगायत देशका विभिन्न भूभागहरूमा वर्षा भईरहेको छ। बिहानदेखि नै धुम्म लागेको काठमाडौं उपत्यकामा आज दिनभरि समेत वर्षा भइरह्यो। वर्षाका कारण विभिन्न कामले घरबाहिर निस्किएका सर्वसाधारणहरू प्रभावित भए। मौसम पूर्वानुमान बारे जानकारी राख्नेहरू छाता र रेनकोट लगाएर आफ्नो गन्तव्यमा जाँदै थिए भने केही वर्षा भिजेर काठमाडौंका सडकहरूमा हिँडिरहेका थिए। जल तथा मौसम पूर्वानुमान महाशाखाका अनुसार देशका पहाडी र हिमाली भेगका केही ठाउँहरूमा मेघगर्जन र चट्याङसहित हल्का वर्षा तथा हिमपात भइरहेको छ। आज दिउँसो गण्डकी, लुम्बिनी, कर्णाली र सुदूरपश्चिम प्रदेशमा पूर्ण बदली रहने र अरु क्षेत्रहरूमा आंशिक बदली रहने छ। ती प्रदेशका धेरै ठाउँहरू र कोशी तथा बागमती प्रदेशका पहाडी एवं हिमाली क्षेत्रका केही स्थानहरूको साथै मधेश, कोशी र बागमती प्रदेशका तराईका केही भागहरूमा मेघगर्जन, चट्याङ, हुरी र असिनासहित मध्यम वर्षा भइरहेको छ। महाशाखाका अनुसार आज राति देशभर सामान्यदेखि पूर्ण बदली रहने सम्भावना छ। कोशी, मधेश, लुम्बिनी, कर्णाली र सुदूरपश्चिम प्रदेशका साथै पहाडी तथा हिमाली क्षेत्रका धेरै भागहरू र तराईका केही ठाउँहरूमा मेघगर्जन तथा चट्याङसहित मध्यम वर्षा र हिमपात हुन सक्ने संभावना छ। मधेश, कोशी र बागमती प्रदेशका तराईका केही स्थानहरूमा मेघगर्जन, चट्याङ, हुरी र असिनासहित मध्यम वर्षा र हिमपात हुने सम्भावना भएकाले महाशाखाले त्यहाँका सर्वसाधारण, यातायात सञ्चालनकर्ताहरू लगायत सबै जिम्मेवार पक्षलाई सतर्क रहन आग्रह गरेको छ।
