२६ चैत, धनगढी। कञ्चनपुर कारागारमा कैदीबन्दीबीचको झडप भएपछि १५ जनाको स्थानान्तरण गरिएको छ। बुधबार आपसी मनमुटावका कारण दुई समूहबीच भएको झडपमा पाँच जना घाइते भएका थिए। झडपमा परेका तीन जना घाइतेसहित १५ जनालाई बुधबार नै नौबस्ता कारागार बाँके स्थानान्तरण गरिएको कञ्चनपुर कारागार प्रशासनले जनाएको छ। जेलर हेमन्ती साउँदले स्थानान्तरण प्रक्रिया पूरा गरी उनीहरूलाई नौबस्ता कारागारमा सारिएको बताइन्। उनका अनुसार बुधबारको झडपमा घाइते भएका भुवन नाथ, भुवन ऐर र प्रकाश घरेडीसहित १५ जनालाई नौबस्तामा पठाइएको हो। झडपमा घाइते भएका अर्को दुई जना दाजु दमाई र आयुष बम भने कञ्चनपुरमै रहेका छन्। महाकाली प्रादेशिक अस्पतालमा उपचारपछि उनीहरू पनि डिस्चार्ज भइसकेका छन्।
कञ्चनपुर कारागारमा यसअघि पनि गत पुस महिनामा कैदीबन्दीबीच झडप भएको थियो। कारागारभित्र बाहिरबाट मदिरा तथा लागूऔषध भित्र्याउने र महँगो मूल्यमा व्यापार गर्ने विषयमा कारागार चौकीदार र नाइकेबीच विवाद हुँदा झडप भएको बताइएको थियो। तर जेलर साउँदले बुधबार भएको झडपको कारणलाई ‘आपसी विवाद’ मात्र भएको बताइन्। अन्य कुरा सुन्नमा आए पनि पुष्टि हुन नसकेको उनले जानकारी गराइन्। ‘‘गलत कार्यहरू भएको भन्ने कुरा सुन्नमा आएको छ, तर अनुगमन तथा निरीक्षणको क्रममा हामीले केही फेला पार्न सकेनौं,’’ साउँदले भनिन्, ‘‘हिजोको झडप आपसी विवादमा सीमित देखिन्छ।’’ अघिल्लो पटकको झडपपछि पनि ९ जना कैदीबन्दीको सारुवा गरिएको थियो। कारागार प्रशासनका अनुसार आठ जनालाई नौबस्ता र एक जनालाई काठमाडौं स्थानान्तरण गरिएको थियो।
झडप हुनुलाई विभिन्न कारणहरूमध्ये एक चौकीदार नहुँदा समस्या देखिनुले समेत प्रभाव पारेको छ। कारागार प्रशासनले चालु आर्थिक वर्षका लागि चौकीदार नियुक्त गरेपछि कर्तव्य ज्यान मुद्दाका प्रकाश बहादुर मल्ललाई दाङ पठाएपछि अर्को व्यक्तिलाई नियुक्त गरिएको छैन। जेलर साउँदले पनि मल्लको सरुवा भएपछि कारागारमा चौकीदार नहुँदा समस्या देखिएको बताइन्। आर्थिक वर्षको सुरुमै चौकीदार नियुक्त गर्ने प्रावधानका कारण नयाँ व्यक्तिलाई जिम्मेवारी नदिइएको उनले जानकारी गराइन्। कैदीबन्दीको नेतृत्व गर्ने चौकीदार नहुँदा त्यहाँ रहेका समूहहरूबीच प्रभुत्व लडाइँ हुनु र आपसी झडप बढ्नु स्वाभाविक रहेको बताइन्छ।
कञ्चनपुरका प्रमुख जिल्ला अधिकारी मदन कोइरालाले बुधबार र पुसमा भएका घटनाहरू फरक-फरक कारणले भएका बताएका छन्। उनले बुधबार कैदीबन्दी स्थानान्तरणको क्रममा झगडा भएको र अघिल्लो पटक आर्थिक पारदर्शिताको विषयमा विवाद भएको बताएका छन्। ‘‘यी दुइ घटना एउटै होइनन्। हिजो कैदीबन्दीलाई स्थानान्तरण गर्ने क्रममा झडप भएको हो। अघिल्लो पटक आर्थिक पारदर्शिताको विषय थियो,’’ प्रजिअ कोइरालाले भने, ‘‘कैदीबन्दीको स्थानान्तरण र आन्तरिक प्रशासन सुधारका कामहरू भएपछि अब समस्या छैन।’’
