गोल्डेनगेट बास्केटबल क्लबले टाइम्सलाई ८८-५५ को फराकिलो अन्तरले पराजित गर्दै हिमालयन जाभा नेशनल बास्केटबल लिगको फाइनलमा स्थान सुनिश्चित गरेको छ। गोल्डेनगेटले फाइनलमा त्रिभुवन आर्मीलाई सामना गर्नेछ भने फाइनल खेल २८ चैतमा आयोजना हुनेछ। गोल्डेनगेटका पाकिस्तानी खेलाडी जाइन खानले ३१ अंक बनाएर खेलको म्यान अफ दि म्याच घोषित भएका छन्। २६ चैत, काठमाडौं।
हिमालयन जाभा नेशनल बास्केटबल लिग (एचजेएनबीएल) २०२६ को दोस्रो क्वालिफायरमा गोल्डेनगेटले टाइम्स बास्केटबल क्लबलाई हराउँदै फाइनल खेल्न सफल भएको हो। त्रिपुरेश्वरस्थित दशरथ रंगशाला कभर्डहलमा बिहीबार साँझ सम्पन्न क्वालिफायरमा गोल्डेनगेटले टाइम्सलाई ८८-५५ ले पराजित गर्यो। अब गोल्डेनगेटले उपाधिका लागि त्रिभुवन आर्मीसँग प्रतिस्पर्धा गर्नेछ।
पहिलो क्वालिफायरमा गोल्डेनगेटलाई हराउँदै आर्मी फाइनल प्रवेश गरिसकेको छ। लिग चरणमा आर्मी पहिलो स्थानमा र गोल्डेनगेट दोस्रो स्थानमा रहेको थियो। यसकारण गोल्डेनगेटले पहिलो क्वालिफायरमा पराजय भोगे तापनि दोस्रो अवसरलाई सदुपयोग गर्दै फाइनलमा पुगेको हो। आर्मी र गोल्डेनगेटबीचको फाइनल खेल चेत २८ गते शनिबार आयोजना हुने छ।
लिगमा तेस्रो स्थानमा रहेको टाइम्सले एलिमिनेटर खेलमा केभिसी हाउण्ड्सलाई पराजित गर्दै दोस्रो क्वालिफायरमा स्थान बनाएको थियो। तर, गोल्डेनगेटको चुनौतीलाई पार गर्न नसक्दा साविक विजेता टाइम्स यस पटक फाइनलमा प्रवेश गर्न असफल भयो। गोल्डेनगेटले पहिलो क्वाटरमा २५-१७ को अग्रता बनायो। दोस्रो क्वाटरमा पनि २१-२० को थोरै अग्रता कायम राख्दै हाफटाइमसम्म गोल्डेनगेट ४६-३७ ले अघि भयो। त्यसपछि तेस्रो क्वाटर १५-८ र चौथो क्वाटर २७-१० को अन्तरले फराकिलो जित हासिल गर्यो। गोल्डेनगेटका पाकिस्तानी खेलाडी जाइन खानले सर्वाधिक ३१ अंक गरे र खेलको उत्कृष्ट खेलाडी घोषित भए।
