२८ चैत, काठमाडौं । अमेरिकाका उपराष्ट्रपति जेडी भान्स इरानसँग शान्ति वार्ता गर्न अमेरिकी प्रतिनिधि मण्डलको नेतृत्व गर्दै पाकिस्तान आउने भएका छन्। यस प्रतिनिधि मन्डलमा राष्ट्रपति डोनाल्ड ट्रम्पका ज्वाइँ जेरेड कुशनर पनि सहभागी छन् जो ट्रम्पको पहिलो कार्यकालमा सल्लाहकार थिए। साथै, अमेरिकाका विशेष दूत स्टीव भिटकफ पनि यस टोलीमा छन्। जेरेड र स्टीवले इजरायल–गाजा युद्धको अन्त्यका लागि युद्धविराम वार्ता र रूस–युक्रेन युद्ध रोक्नका लागि भएका वार्तामा पहिला पनि भाग लिएका थिए।
अमेरिकी प्रतिनिधि मण्डल सवार विमान ‘एयर फोर्स टु’ फ्रान्सको राजधानी पेरिसमा पूर्वनिर्धारित कार्यक्रम अनुसार इन्धन भर्न रोकिएको छ। पाकिस्तान उडान अघि उपराष्ट्रपति भान्सले पत्रकारहरूसमक्ष भने, ‘यदि इरानीहरू सद्भावपूर्वक वार्ता गर्न इच्छुक छन् भने हामी पनि खुला मनले सहकार्य गर्न तयार छौं।’ उनले राष्ट्रपति डोनाल्ड ट्रम्पले अमेरिकी वार्ता टोलीलाई ‘केही स्पष्ट दिशानिर्देश’ दिएका पनि जानकारी गराएका छन्।
उपराष्ट्रपति भान्सले इरानका उच्चस्तरीय प्रतिनिधिलाई चेतावनीसमेत दिएका छन्। उनले भने, ‘यदि हामीलाई बेवकुफ बनाउने प्रयास गरियो भने इरानले अमेरिकी वार्ता टोली सजिलो नभएको कुरा बुझ्नेछ।’ यसअघि, इस्टर पर्वको अवसरमा ह्वाइट हाउसमा आयोजित भोजमा राष्ट्रपति ट्रम्पले इरान युद्ध अन्त्य गर्ने सम्झौतामा भान्सको भूमिकाबारे उठेका अड्कलबाजीलाई सम्बोधन गरेका थिए। ट्रम्पको सम्बोधनले पाकिस्तानमा इरानसँग वार्ता गर्ने अमेरिकी प्रतिनिधिमण्डलको नेतृत्व उपराष्ट्रपति भान्सले गर्ने देखिएको छ।
यो उपराष्ट्रपतित्वको सबैभन्दा चुनौतीपूर्ण जिम्मेवारी हो जहाँ सफलता सीमित रहन सक्छ र वार्ता असफल भएमा गुमाउने धेरै कुरा हुनेछन्। इस्लामाबादमा जारी भान्सको कूटनीतिक यात्रालाई राजनीतिक दृष्टिले अत्यन्तै संवेदनशील ठहरिएको छ। युद्ध अन्त्य गर्न स्थायी सम्झौतामा प्रगति गर्न उनलाई छ हप्तासम्म चलिरहेको सैन्य कारबाहीले एकअर्काप्रति अविश्वास राखेका पक्षहरूलाई सन्तुष्ट पार्नु पर्दछ। इरानका संसद् सभामुख मोहम्मद बाघेर घालिबाफ र विदेशमन्त्री अब्बास अराघचीले पाकिस्तानको राजधानी इस्लामाबादमा अमेरिकासँग वार्ता गर्न पुगिसकेका छन्।
