२८ चैत, काठमाडौं । पाकिस्तानको राजधानी इस्लामावादमा पाकिस्तानको मध्यस्थतामा अमेरिका र इरानबीच शान्ति वार्ता सुरु भएको छ। अमेरिकी सञ्चारमाध्यम सीएनएनले इरानी सरकारी सञ्चारमाध्यमलाई उद्धृत गर्दै शनिबार दिउँसोदेखि तीनै देशका वार्ताकारहरू वार्तामा सक्रिय भए भन्ने जानकारी दिएको छ। वार्ता इस्लामावादस्थित पाँचतारे होटेल सेरेनामा भइरहेको छ। अर्को अन्तर्राष्ट्रिय सञ्चार संस्था अलजजिराले यो सन् १९७९ को इरानी इस्लामिक क्रान्तिपछि वासिङ्टन र तेहरानबीच सञ्चालनमा आएको पहिलो उच्चस्तरीय वार्ता रहेको उल्लेख गरेको छ।
अमेरिकी पक्षबाट वार्ताको संयोजन उपराष्ट्रपति माइक पेंसले गरिरहेका छन्। उनीसँगै राष्ट्रपति डोनाल्ड ट्रम्पका विशेष दूत स्टिभन विटकर र ट्रम्पका ज्वाइँ जारेड कुस्नरसहितको प्रतिनिधिमण्डल वार्तामा सहभागी छ। इरानी पक्षबाट संसदका सभामुख मोहम्मद बगेर गालीबाफले वार्ता टोलीको नेतृत्व गरिरहेका छन्, जसमा विदेशमन्त्री अब्बास अरकची पनि समावेश छन्। वार्ता सुरु हुनुअघि, पाकिस्तानी प्रधानमन्त्री शहबाज शरीफले अमेरिकी र इरानी प्रतिनिधिमण्डलसँग छुट्टाछुट्टै संवाद गरेका थिए।
पाकिस्तानको प्रधानमन्त्री कार्यालयले पनि बहुप्रतीक्षित उक्त शान्ति वार्ता सुरु भएको जानकारी उपलब्ध गराएको छ। बीबीसीले भने पाकिस्तानका स्रोतलाई उद्धृत गर्दै दिउँसो ४ बजेदेखि वार्ता सुरु भएको जनाएको छ, तर वार्ताको प्रक्रिया पूर्ण रूपमा स्पष्ट नभएको उल्लेख गरेको छ। पाकिस्तानी सरकारी स्रोतहरूले बीबीसी उर्दूलाई दिएको जानकारीअनुसार, पाकिस्तानी अधिकारीहरूको प्रयास अमेरिका र इरानका प्रतिनिधिमण्डललाई प्रत्यक्ष वार्तामा ल्याउने रहेको छ। अहिलेसम्म दुवै देशका वार्ता प्रतिनिधिहरू बीच सन्देश आदानप्रदान पाकिस्तानी अधिकारीहरू मार्फत मात्र हुँदै आएको थियो र सकारात्मक संकेत देखिएपछि मात्रै प्रत्यक्ष वार्तामा बस्ने सहमति भएको स्रोतहरूले बताएका छन्।
