सन्तोष शाहले नवनिर्वाचित सांसदहरूलाई जनताको विश्वास र ठूलो जिम्मेवारी बोकेको उल्लेख गर्दै इमानदारी र निष्ठाका साथ काम गर्न विनम्र अनुरोध गरेका छन्। नवनिर्वाचित सांसदज्यूहरूका लागि खुला पत्र, माननीय सांसदज्यूहरू, हार्दिक नमस्कार। भदौ २३ र २४ गतेको जनआन्दोलनपछि मुलुकमा ठूलो परिवर्तन आएको छ। वर्तमान सरकार त्यो आन्दोलनको प्रतिफल हो। नेपाली जनताले आशा र विश्वासका साथ तपाईंहरूलाई जिताएर संसदमा पठाएका छन्। सांसद हुनु केवल पद र शक्ति मात्र होइन, त्यो ठूलो जिम्मेवारी र सम्मान पनि हो। तपाईंहरूप्रति जनताको गहिरो विश्वास छ।
हाम्रो देशले जनआन्दोलन, माओवादी आन्दोलन, मधेश आन्दोलनदेखि युवा आन्दोलनसम्म विभिन्न ऐतिहासिक चरणहरू पार गरेको छ। यी सबै त्याग र बलिदानलाई सधैं सम्झन आवश्यक छ। तपाईंहरूका समक्ष मैले केही अपेक्षाहरू विनम्रतापूर्वक राख्न चाहन्छु: सांसदको कर्तव्य भनेको देश र जनताको प्रतिबिम्ब हुनु हो। जनताका समस्या, पीडा र पीडालाई सरकारसमक्ष निर्धक्क प्रस्तुत गर्नु हो। संसदमा जनताको आवाज बनेर सरकारलाई चुनौती दिनु हो। साथै, समस्याको समाधानका लागि जनमुखी नीतिनिर्माण गर्नु पनि हो। तपाईंहरूले आफ्नो भूमिकालाई हल्का रूपमा नलिनु हुन विनम्र अनुरोध गर्दछु।
सस्तो लोकप्रियताका लागि मिडियामा प्रदर्शन वा व्यक्तिगत प्रचारमा लिप्त नहुनुहोला। नेतृत्व भनेको शक्ति प्रदर्शन होइन, सेवा र विनम्रता हो। शक्तिको आडमा जनतासँग दूरी नबढाउनुहोस्। सधैं सरल, विनम्र र भुइँमान्छे भएर बाँचे रहनुहोला। मलाई जनताले काम गर्नका लागि जिताएर पठाएको हो, मैले जनताको हितमा काम गर्नुपर्छ भन्ने कुरा सदैव स्मरण गर्नुहोला। पद र शक्ति भगवानको उपहार जस्तै हो, त्यसैले इमानदारी र निष्ठासाथ जिम्मेवारी पूरा गर्नुहोस्।
अहिले संसदमा युवा पुस्ताको प्रभुत्व छ। यसले अघिल्लो पुस्ताका नेताहरूको कुनै महत्व छैन भन्ने नसोच्नुहोला। देश निर्माणको मार्गमा आफ्नो अघि बढिसकेका अग्रजहरूको मार्गदर्शन आवश्यक पर्ने कुरा बुझ्नुपर्छ। साथै लामो समयसम्म नेपाली राजनीतिमा नेतृत्व गर्दै आएका अग्रहजहरूले पनि अब युवा पुस्तालाई जिम्मेवारी सुम्पिनुपर्ने समय आएको बुझ्नुहोला। तपाईंहरूले देशको सेवा गर्ने मौका पाउनुभएको छ। अब युवा पुस्तालाई देश विकासको अवसर दिनुहोस्।
जनताले विदेशी मुलुक जस्तो नेपालको सपना देखेका छैनन्। नेपालीले नेपाललाई नेपालको जस्तै रक्षा गर्न चाहन्छन्। सबै नेपालीहरूको चाहना लगभग उस्तै छ। धारा बाट शुद्ध पानी झरिरहोस्, मेहनतअनुसार फल पाइयोस्, रोजगारी र व्यवसाय गर्ने सहज वातावरण होस्। आफ्नै देशमा उत्पादन भएका अन्न, तरकारी, फलफूल खान पाइयोस्। स्वच्छ हावामा सास फेर्न पाइयोस्। कृषकहरूले उचित मूल्य पाउनुपर्नेछ। कर्णाली, सुदूरपश्चिमजस्ता विकट ठाउँमा पनि बिजुली र सडक पुगीसको सपना पुरा होस्। सुत्केरी महिलाले बाटोमै मृत्यु नहोस्। सजिलो उपचार सुविधा उपलब्ध होस्।
पढाइ र उपचारका लागि घरजग्गा बेच्न नपरोस्। नेपालमा अवसर नपाएर कोही खाडी मुलुक जान नपरोस्। आर्थिक अभावका कारण कोही बच्चा पढाइबाट बञ्चित नहोस्। सडकमा हिंड्दा सुरक्षित महसुस होस्। कोही बच्चा आर्थिक अभावले पढ्न नपरोस्। सरकारी काममा जाँदा धेरै झन्झट नहोस्। सजिलै सेवा सुविधा पाइयोस्। योग्य व्यक्तिलाई अवसर दिइयोस्। नातावाद र कृपावाद नहोस्। भ्रष्टाचारको अन्त्य होस् र सुशासन कायम रहोस्। नेपाली जनता यसरी भए धेरै खुसी हुनेछ। त्यसैले जनताको सुख-शान्तिलाई प्राथमिकता दिन विनम्र अनुरोध गर्दछु। आशा र सम्मानका साथ, सन्तोष शाह, तपाईंहरूको माया पाएको एक साधारण भात पकाउने मान्छे, ‘हाम्रो विकसित नेपाल कस्तो होस्?’
