नेपाल पत्रकार महासंघ इलाम शाखाले आशिष स्मृति पत्रकारिता पुरस्कार २०८३ अनलाइनखबरका सुदीप श्रेष्ठलाई प्रदान गरेको छ। श्रेष्ठले सम्मान पत्र र नगद १० हजार रुपैयाँ पुरस्कार प्राप्त गरेका छन्। इलाम शाखाले क्रियाशील महिला पत्रकारीता पुरस्कार बुद्ध सोङ्मीलाई पनि प्रदान गरेको छ।
१ वैशाख, इलाम। आज नेपाल पत्रकार महासंघ इलाम शाखाले सुदीप श्रेष्ठलाई उक्त पुरस्कार प्रदान गरेको हो। जिल्ला समन्वय समिति अध्यक्ष जयप्रकाश राई, इलाम नगरपालिकाका प्रमुख केदार थापा र प्रमुख जिल्ला अधिकारी लक्ष्मण ढकालले श्रेष्ठलाई दोसल्ला ओढाइ सम्मान गरे।
श्रेष्ठले २०६० सालदेखि पत्रकारितामा सक्रियता देखाउँदै इलामबाट प्रकाशन हुने आँखा साप्ताहिकबाट आफ्नो पत्रकारिता यात्रा सुरु गरेका थिए। उनले सप्तकोशी एफएम, रेडियो नेपालवाणी एफएम, सगरमाथा टेलिभिजन, उद्घोष दैनिक र इलाम एक्सप्रेस दैनिकमा सम्वाददाता र कार्यक्रम सञ्चालकको रूपमा काम गरेका छन्। हाल उनी अनलाइनखबरका इलाम संवाददाताका रूपमा कार्यरत छन्।
रेडियो नेपालका तत्कालीन इलाम समाचारदाता आशिष राईको ०५९ साल वैशाख १ गते इलामको माइखोलामा पौडी खेल्ने क्रममा डुबेर निधन भएको थियो। उनै आशिषको स्मृतिमा प्रत्येक नयाँ वर्षका दिन मेची क्षेत्रको पत्रकारीतामा महत्वपूर्ण योगदान पुर्याउने पत्रकारलाई यो पुरस्कार प्रदान गरिन्छ। यसअघि पनि विभिन्न पत्रकारहरूले यो पुरस्कार प्राप्त गरिसकेका छन्।
