समाचार सारांश संपादकीय समीक्षा सहित। नेपाली कांग्रेसले प्रतिनिधिसभा निर्वाचनमा पराजयपछि मधेश, गण्डकी र लुम्बिनी प्रदेशमा चुनावी समीक्षा कार्यक्रम सम्पन्न गरेको छ। समीक्षामा पार्टीभित्र अन्तर्घात, असहयोग र विशेष महाधिवेशन पक्षधरको असमझदारी हारको प्रमुख कारणको रूपमा उजागर भएको छ। सभापति गगन थापाले पार्टीलाई एकताबद्ध बनाएर अगाडि बढ्नुपर्ने र सबै नेतालाई सम्मान दिनुपर्ने बताएका छन्। १ वैशाख, काठमाडौं। निर्वाचनमा पराजय व्यहोरेको नेपाली कांग्रेस अहिले प्रदेश–प्रदेशमा चुनावी समीक्षा गरिरहेको छ। निर्वाचन सम्पन्न भएको एक महिनापछि कांग्रेसले मधेश प्रदेशबाट सुरुवात गरेको हो। सभापति गगन थापाको नेतृत्वमा कांग्रेसले मधेश, गण्डकी र लुम्बिनी प्रदेशमा चुनावी समीक्षा सम्पन्न गरिसकेको छ। मधेश प्रदेशमा २४ चैत, गण्डकीमा २७ चैत र लुम्बिनीमा २९ चैतमा समीक्षा गरिएको थियो। वैशाख ३ गते कर्णालीको सुर्खेत, ५ गते सुदूरपश्चिमको धनगढी, ७ गते बागमतीको हेटौंडा र ९ गते कोशीको विराटनगरमा समीक्षाका कार्यक्रम तय थिए। तर, केन्द्रीय कार्यालयले सुर्खेतमा हुने समीक्षा ११ वैशाखमा सार्ने निर्णय गरेपछि अन्य प्रदेशहरूको पनि कार्यक्रम पछि सरेको छ। कर्णाली प्रदेशका महामन्त्री निरंजन केसीले विज्ञप्ति जारी गर्दै ३ वैशाखमा तय गरिएको प्रदेश स्तरीय समीक्षा ११ वैशाखमा हुने जानकारी दिएका छन्।
प्रतिनिधिसभा निर्वाचनमा सर्लाही–४ मा रास्वपाकी नेता डा. अमरेशकुमार सिंहसँग पराजित भएपछि सभापति थापा २४ चैतमा मधेश प्रदेशमा पहिलो पटक चुनावी समीक्षा गर्न पुगेका थिए। धनुषाको जनकपुरमा भएको समीक्षा कार्यक्रममा सभापति थापा, उपसभापति पुष्पा भुसाल, महामन्त्री गुरुराज घिमिरे, सहमहामन्त्री फरमुल्ला मन्सुर र डा. डिला संग्रौला लगायत शीर्ष नेताहरू सहभागी थिए। कांग्रेसले मधेश प्रदेशका ३२ निर्वाचन क्षेत्रका उम्मेदवार, क्षेत्रीय र जिल्ला सभापति, प्रदेश सभापति तथा पदाधिकारी र केन्द्रीय प्रतिनिधिहरूलाई बोलाएर समीक्षा गरेको हो। समीक्षा कार्यक्रममा हारको कारण, आगामी कार्यदिशा लगायत विषयमा छलफल भएको सहभागीहरूले बताएका छन्। पार्टीभित्र अन्तर्घात भएको, केही नेताहरूले उम्मेदवारलाई मत नदिएको र सहकार्य नगरेको गुनासो उठेको छ। सहभागी कांग्रेस सप्तरी सभापति रामदेव शाहले भने, “चुनावमा किन हार भयो, के कारणले भनिन्छ, यही चर्चा भयो। कांग्रेसले सक्रिय सदस्यताभन्दा कम भोट पाएको जस्ता कुराहरू अघि आएका थिए।” शाहले अगाडि भने, “अन्तर्घात गर्नेलाई कारबाही गर्नुपर्छ। मैले स्पष्ट रूपमा भनेँ – असहयोग गर्नेमाथि कारबाही आवश्यक छ।”
कार्यक्रममा बारा–३ क्षेत्रीय सचिव राजेश भण्डारीले पनि अनुशासनहीनता अन्त्यको आवश्यकताबारे कुरा गरे। उनले भने, “असहयोग गर्नेमाथि कारबाही हुनुपर्छ। यसलाई गम्भीररूपमा विश्लेषण गरेर कारबाही बढाउनुपर्छ।” मधेश प्रदेशका नेताहरूले कांग्रेसको पराजयमा धेरै कारण रहेको जनाएको छ। “चुनाव एउटा कारणले मात्र हारिएको होईन, विभिन्न पक्ष छन्,” उनीहरूले भने, “परिवर्तनको लहर बुझ्न नसकिएको, इमान्दार नेताहरू हार्नुमा कारणहरू छन्। छिट्टै भन्न सकिने कुरा छैन।” समीक्षामा निवर्तमान सभापति देउवाकटका नेताहरू रमेश रिजाल, अजय चौरसिया, दिनेश यादवल लगायत पनि थिए। उनीहरूले सभापति थापालाई पार्टीलाई एकताबद्ध बनाएर अघि बढ्न आग्रह गरेका थिए। नेता भण्डारीले भने, “सभापतिज्यूलाई हामी साथमा छौं, पार्टीलाई एकताबद्ध बनाउँछौं भन्नुभयो। गगन थापाको विकल्प छैन, अगाडि बढ्नुहोस् भन्नुभयो।”
