फोटो क्रेडिट : संयुक्त राष्ट्रसंघ समाचार संक्षेप समीक्षा पश्चात तयार गरिएको। अप्रिल १५ लाई संयुक्त राष्ट्रसंघको महासभाले अन्तर्राष्ट्रिय स्वास्थ्य दिवसको रूपमा घोषणा गरेको हो। नेपालले यस वर्षदेखि अन्तर्राष्ट्रिय स्वास्थ्य दिवस विश्वका विभिन्न देशहरूमा मनाउने प्रस्ताव गरेको छ। यस दिवसले सबैलाई सस्तो, सुलभ र समावेशी स्वास्थ्य अभ्यास अपनाउन उत्प्रेरित गर्ने लक्ष्य राखेको छ। २ वैशाख, काठमाडौं। आज विभिन्न कार्यक्रमहरूका बीच अन्तर्राष्ट्रिय स्वास्थ्य दिवस मनाइएको छ। यस वर्षदेखि नेपालको अगुवाइमा विश्वका विभिन्न देशहरूमा यो दिवस मनाउन थालिएको छ। समग्र स्वास्थ्य, सुख र सन्तुलित जीवनशैली प्रवर्द्धन गर्ने उद्देश्यले संयुक्त राष्ट्रसंघको महासभाले अप्रिल १५ लाई अन्तर्राष्ट्रिय स्वास्थ्य दिवसको रूपमा घोषणा गरेको हो। हरेक वर्ष स्वास्थ्य दिवस मनाउने प्रस्ताव नेपालले गरेको थियो जसलाई महासभाले गत फागुन २६ गते अनुमोदन गरेको थियो। सबैलाई सस्तो, सुलभ र समावेशी स्वास्थ्य अभ्यासतर्फ प्रेरित गर्नु यस दिवसको प्रमुख लक्ष्य हो।
रोग लागेपछि उपचारमा मात्र नभई रोग लाग्न नदिने रोकथाममूलक उपाय, स्वस्थ जीवनशैली र मानिस केन्द्रित स्वास्थ्य प्रणालीमार्फत जीवन रक्षा, स्वास्थ्य खर्चमा कमी र रोकथामयोग्य रोगको नियन्त्रणमा यो दिवसले महत्वपूर्ण योगदान दिने विश्वास गरिन्छ। संयुक्त राष्ट्रसंघले आदिवासी जनजाति तथा स्थानीय समुदायका संस्कृतिहरू र परम्परागत ज्ञानको महत्त्व स्वीकार्दै प्रमाणमा आधारित परम्परागत चिकित्सापद्धतिले स्वास्थ्य प्रणाली सुदृढ बनाउन र समग्र स्वास्थ्य प्रवर्द्धन गर्न योगदान पुर्याउने जनाएको छ। राष्ट्रसंघका अनुसार यो दिवसले विश्वव्यापी जनचेतना अभिवृद्धि, सांस्कृतिक आदानप्रदान र ज्ञान साझेदारीका लागि मञ्च तयार गर्ने उद्देश्य राख्छ। विभिन्न कार्यक्रमहरू पनि आयोजना भइरहेका छन्। संयुक्त राष्ट्रसंघले प्रत्येक व्यक्तिको स्वास्थ्य, खुशी र समग्र कल्याणमा विशेष महत्व दिँदै यसअघि घोषणा भएका अन्तर्राष्ट्रिय खुशी दिवस (मार्च २०), अन्तर्राष्ट्रिय योग दिवस (जुन २१) र विश्व ध्यान दिवस (डिसेम्बर २१) ले पनि समग्र स्वास्थ्य प्रवर्द्धनमा योगदान गर्ने बताएको छ। दिगो विकास लक्ष्यको तेस्रो प्राथमिकतामा स्वास्थ्यलाई उच्च प्राथमिकतामा राखिएको छ जसले सबै उमेर समूहका लागि स्वस्थ जीवन सुनिश्चित गर्ने लक्ष्य राख्छ। मातृ तथा शिशु स्वास्थ्य, सरुवा र नसर्ने रोग नियन्त्रण, आवश्यक औषधि तथा खोपमा पहुँच, मानसिक स्वास्थ्य प्रवर्द्धन र स्वास्थ्य असमानता न्यूनीकरण यसका मुख्य प्राथमिकताहरू हुन्।
सम्बन्धित खबर
