संसदीय समितिहरूको सभापतिमा मनोनयन दर्ता भोलि हुँदैछ

२ वैशाख, काठमाडौं । संसदीय समितिहरूको सभापतिमा मनोनयन दर्ता भोलि बिहीबार गरिने छ। संघीय संसद सचिवालयका अनुसार, भोलि दिउँसो १ बजेदेखि ४ बजेसम्म मनोनयन दर्ता गर्न सकिनेछ। मनोनयन दर्ताको कार्यवाही सिंहदरवारस्थित प्रतिनिधिसभा सचिवको कार्यालयमा सञ्चालन हुनेछ। भोलि दिउँसो साढे ४ बजे उम्मेदवारहरूको सूची प्रकाशित गरिने छ।

संघीय संसदमा जम्मा १६ वटा संसदीय समिति रहेका छन्। प्रतिनिधिसभा अन्तर्गत १० वटा, राष्ट्रिय सभा अन्तर्गत ४ वटा, र दुई वटा संयुक्त समिति रहेका छन्। राष्ट्रिय सभाका विषयगत समितिका सभापतिहरूको निर्वाचन पहिल्यै सम्पन्न भइसकेको छ भने प्रतिनिधिसभा अन्तर्गतका १० वटा र संयुक्त दुई वटा समितिका सभापति पदका लागि निर्वाचन हुन बाँकी छ। गत चैत २७ गते प्रतिनिधिसभाले विषयगत समितिमा रहेका सदस्यहरू निर्धारण गरिसकेको थियो। सोही दिन सभामुख डोलप्रसाद अर्यालले आगामी शुक्रबार संसदीय समितिका सभापतिको निर्वाचन मिति तोकेको थिए।

सम्बन्धित समितिका कुनै सदस्यलाई सभापतिमा निर्वाचित गराउन सोही समितिका एकजना सदस्य प्रस्तावक र अर्को सदस्यको समर्थनमा सभापतिका लागि दाबी पेश गर्न सकिनेछ।