नेपाली कांग्रेसका नेता अर्जुननरसिंह केसीले सबैको प्राथमिकता पार्टी एकतामा केन्द्रित हुनुपर्ने बताएका छन्। सर्वोच्च अदालतले विशेष अधिवेशनको वैधता पुष्टि गरिसकेकोले दम्भ र अहंकार गर्न नहुने केसीले बताएका छन्। उनले १५ औं महाधिवेशनलाई एकता अधिवेशन र अभियानका रूपमा सफल बनाउनु आवश्यक रहेको उल्लेख गरेका छन्। ५ वैशाख, काठमाडौं।
केसीले भने, “विशेष अधिवेशन विधिवत् रहेको विषय अदालतबाट टुङ्गो लागिसकेको वर्तमान अवस्थामा अब हामी सबैको प्राथमिकता कतैबाट पनि दम्भ, अहंकार वा शक्ति प्रदर्शन होइन, समग्र पार्टी एकतामा केन्द्रित हुनुपर्छ।” उनले लोकतान्त्रिक पार्टीमा वाद–विवाद स्वाभाविक भएको भन्दै संवाद र सहमतिमार्फत् सबै पक्षको सम्मान गर्दै १५ औं महाधिवेशनलाई सफल बनाउन आवश्यक भएको बताएका छन्।
“असहमतिमा रहेका साथीहरूलाई समेट्दै साझा एजेन्डा तय गर्ने, व्यक्तिगत विवादभन्दा विधान, प्रक्रिया र संस्थागत हितलाई प्राथमिकता दिने संस्कार विकास गर्नु आजको हाम्रो साझा दायित्व हो,” केसीले लेखेका छन्। उनले वर्तमान चुनौतीहरू सामना गर्न सक्षम, सुदृढ र एकीकृत कांग्रेस बनाउन नेतृत्वले उदारता, सहिष्णुता र समावेशी निर्णय प्रक्रियालाई अझ सशक्त बनाउनुपर्ने बताए।
