पर्वतकी १४ वर्षीया किशोरी आठ दिनदेखि बेपत्ता

६ वैशाख, पर्वत । जिल्लाको मोदी गाउँपालिका-२ देउपुरकी १४ वर्षीया किशोरी रितिका जैसी विगत आठ दिनदेखि बेपत्ता छिन्। गत चैत २९ गते उनी जलजला गाउँपालिका–७ धाइरिङस्थित आफ्नो मामाघरबाट आफ्नै घर फर्कने क्रममा हराएकी हुन्। मालढुङ्गा–बेनी सडकअन्तर्गत मिलनचोकबाट मोदी गाउँपालिकाको पातीचौर जान गाडीमा चढेको कुरा प्रमाणित भए पनि अहिलेसम्म उनको सम्पर्कमा आउन सकेको छैन भन्ने जानकारी प्रहरीले दिएको छ।
प्रहरी नायब उपरीक्षक विजय यादवले बेपत्ता किशोरीको खोजी तीव्र पारिएको र मातहतका सबै प्रहरी युनिटलाई हुलियासहित सक्रिय रूपमा खोजी जारी राख्न निर्देशन दिइएको बताएका छन्। स्थानीय शिक्षक भूमिराज शर्माले किशोरी गाडी चढेपछि बाटोमा रहेको पातीचौरमा नभई कास्कीको पोखरा महानगरपालिका–२५ हेमजाको मिलनचोकमा झरेको पाइएको जानकारी दिएका छन्। उनी झर्नुपर्ने ठाउँबाट करिब ३५ किलोमिटर टाढा हेमजामा ओर्लिए पनि त्यसपछि उनको अवस्था थाहा छैन।
किशोरी देउपुरमै रहेको स्थानीय जननेत्र माध्यमिक विद्यालयको कक्षा ८ पूरा गरी अब कक्षा ९ मा भर्ना हुने तयारीमा थिईन्। परिवारले उनको सम्पर्कमा पुगे वा शंकास्पद व्यक्तिबारे कुनै जानकारी पाएमा नजिकैको प्रहरी कार्यालयमा खबर गरी खोजीमा सहयोग गर्न सबैसँग अनुरोध गरेको छ।