२५औं आइटीएफ तेक्वान्दो राष्ट्रिय प्रतियोगितामा नेपाल आर्मी टोलीले १९ स्वर्ण सहित च्याम्पियनको उपाधि हात पारेको छ। प्रतियोगितामा आर्मीका सुमन मरासिंगी मगर र रिना धिमाललाई उत्कृष्ट खेलाडीको रूपमा घोषणा गरिएको छ। यू-१५ आइटीएफ प्रतियोगितामा बागमती प्रदेशले पहिलो स्थानमा कब्जा जमाएको छ। ६ वैशाख, काठमाडौं।
नेपाल अन्तर्राष्ट्रिय तेक्वान्दो महासंघ (एनआइटीएफ) को आयोजनामा त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सम्पन्न दुईदिने प्रतियोगितामा आर्मीले १९ स्वर्ण, ४ रजत र ९ कांस्य पदक जित्दै च्याम्पियन बनेको हो। यस्तै, बागमतीले ७ स्वर्ण, १० रजत र ९ कांस्यसहित दोस्रो स्थान पाएको छ भने एपीएफले ४ स्वर्ण, ७ रजत र ६ कांस्य सहित तेस्रो स्थान हासिल गरेको छ।
व्यक्तिगततर्फ पनि आर्मीका खेलाडीहरूले उत्कृष्ट प्रदर्शन गरेका छन्। सुमन मरासिंगी मगर पुरुषतर्फ र रिना धिमाल महिलातर्फ उत्कृष्ट खेलाडी घोषित भएका छन्। सुमनले ३ स्वर्ण र रिनाले ५ स्वर्ण पदक जितेका छन्। विभिन्न विधाअन्तर्गत खेलाडीहरूले एकल स्पारिङ, एकल प्याटर्न, समूह स्पारिङ, समूह प्याटर्न तथा सेल्फ डिफेन्समा प्रतिस्पर्धा गरेका थिए।
त्यस्तै, दोस्रो यू-१५ आइटीएफ प्रतियोगितामा बागमती पहिलो, लुम्बिनी दोस्रो र कर्णाली प्रदेश तेस्रो स्थानमा रहेका छन्। बागमतीले ९ स्वर्ण, ५ रजत र ७ कांस्य पदक, लुम्बिनीले ४ स्वर्ण, ६ रजत र ७ कांस्य र कर्णालीले ४ स्वर्ण, ५ रजत र ७ कांस्य पदक जितेको छ। यू-१५ वर्गमा पुरुषतर्फ गण्डकीका सचिन कुमाल र महिलातर्फ बागमतीकी आकृति नेपाल उत्कृष्ट खेलाडी घोषणा गरिएका छन्। प्रतियोगितामा जूनियर र सिनियर तहमा प्याटर्न र स्पारिङ गरी कुल दुई सयभन्दा धेरै खेलाडीले सहभागिता जनाएका थिए भन्ने जानकारी महासंघका अध्यक्ष प्रवीणकुमार कार्कीले दिएका छन्। प्रतियोगितामा सातै प्रदेशसहित नेपाल आर्मी र सशस्त्र प्रहरी बलको एपीएफ गरी कुल ९ टोलिहरूको सहभागीता थियो।
